"Komandanın qeyri-sabit çıxışıyla bağlı ən bilgili olan şəxs Rəşad Sadıqovdu. Bu vəziyyətdən çıxış yolunu da axtarır. Subyektiv fikirlərimə gəlincə, "Zirə" hər hissədə fərqli çıxış edir. Ya ilk yarıda yaxşı oynayıb, fasilədən sonra tükənir, ya da 1-ci hissədə qapanır, 2-ci yarıda yaradıcı oyuna üstünlük verir. Bunun da əsas səbəbi komandanın iki oyuçu - Keyta ilə Rəhimin üzərindən qurulmasıdı. Hər iki futbolçu komandası üçün daha çox qaçır, döyüşür, qol axtarır. Amma komanda yoldaşlarından lazımi dəstəyi ala bilməyəndə həm irəlidə kəsərli hücumlar qurulmur, həm də adı çəkilən futbolçular əldən düşür. Rəqiblər də Keyta ilə Rəhimi daim diqqətə saxlayır, onlara göz açmağa imkan vermir. Bunu "Səbail” və "Qarabağ"la son oyunlarda da gördük. Həmçinin "Zirə" heç cür irəlidə çoxala bilmir. Komandanın ən böyük çatışmazlığından biri budu. Oyun iki futbolçu üzərində qurulmur. Digər səhvlər isə qapıçı və müdafiçilərlə bağlı. Qapıçılar ya çıxışlarda səhvlər edir, ya da zərbə anında səhv mövqe tuturlar. Müdafiədəki boşluqlar isə arxa xətt oyunçuları arasında rabitənin düzgün olmamasından xəbər verir. Elə müdafiəçilərlə qolkiperlər arasındakı anlaşılmazlıqları da bura əlavə edərdim. Qəsəbə təmsilçisi kuryoz qollar da buraxır. Çempionatın 1-ci yarısında da bunu gördük, "Qarabağ"la matçda da”.

“Heyətdə optimallıq yoxdu. Komandada zədəli, cəzalı futbolçular çox olur. Düşünürəm ki, psixoloji cəhətdən toparlanmalı, arxa xətdəki boşluqları, qapıçı və müdafiəçilər arasında anlaşılmazlığı aradan qaldırmalı və irəlidə çoxalmağa çalışmalıdılar. Əks halda "Zirə" daha da tənəzzül edəcək".