Mövsümün əvvəlində baş məşqçisi dəyişən, büdcəsi artan, heyəti güclənən komandalardan biri də "Səbail" idi.

Buna rəğmən, Mahmud Qurbanov və yetirmələri etimadı doğrultmur. “Dənizçilər” uğursuz çıxışla azarkeşlərini üzməkdə davam edir. Bununla yanaşı, futbolçuların intizamsızlığı da diqqəti çəkir. “Səbail” cari mövsümdə qırmızı vərəqəyə ən çox tuş gələn komandadı. Bütün bunlarla bağlı klubun icraçı direktoru Fərəc Əliyevlə danışmağı lazım bildik.

- Azarkeşlər və futbol ictimaiyyəti cari mövsümdə daha iddialı, gözoxşayan oyunu ilə diqqəti çəkən "Səbail" görəcəyinə ümid edirdi. Amma əksi baş verir. Bunun səbəbi nədi?
- Ötən mövsümlə müqayisədə köklü dəyişikliklər etdik. Komandanın “sükanı arxasına” Mahmud Qurbanov gətirildi, bir çox futbolçu yola salındı, yeni transferlər etdik. Qısası, komandanı yenidən qurduq. Ölkə xaricində də təlim-məşq toplanışı keçdik. Amma komanda tam komplektləşmədən çempionata başladıq. Sadaladıqlarım çempionat oyunlarındakı nəticələrimizə təsirsiz ötüşmədi.

- Sadaladıqlarınız “Səbail”in özündən zəif komandalarla görüşlərdə xal itirməsinə haqq qazandırır?
- Təbii ki, haqq qazandırmır. Əslində komanda olaraq, oyun planında problem yoxdu. Çempionatda ən çox hücumda oynayan komandalardan biriyik. Hər qarşılaşmada çoxlu fürsəti dəyərləndirə bilmirik. Sanki şanssız komandayıq, bəxtimiz gətirmir. Son oynunu da hücumda keçirən, hesabı açmaq üçün alışıb-yanan biz idik. Sadəcə, Nihad Qurbanlının qırmızı vərəqə alması planlarımızı pozdu. Futbolçu meydandan qovulmasa, fərqli nəticə olacaqdı.

- Çempionatda ən çox qırmızı vərəqə alan futbolçular sizdədi. Hətta Tural Bayramlı artıq iki dəfə meydandan qovulub. Bu intizamsızlığın səbəbi nədi?
- İntizamsızlıq deməzdim. Mahmud Qurbanov kimi məşqçinin rəhbərlik etdiyi komandada intizamsızlıq ola bilməz. Sadəcə, görünür, futbolçular meydanda istəniləni verə bilmir.

- Mahmud Qurbanov "Kəpəz"lə oyunsonrası mətbuat konfransında dedi ki, “futbolçularımız arasında kobud və aqressiv oyunun fərqini bilməyənlər var, nə qədər izah etsək də, onlara bu fərqi aşılaya bilmirik". Sizə elə gəlmir ki, futbolçularla məşqçi arasında uçurum var və ya bəzi futbolçular intizamsızlıqla yanaşı, sanki bilərəkdən zəif çıxış edir?
- Baş məşqçimizin söylədiklərinə qoşuluram. Bəzi futbolçular tapşırıqları yerinə yetirməkdə çətinlik çəkir. Amma onlarla baş məşqçi arasında problemin, qarşıdurmanın olması mümkün deyil. Həmçinin hansısa futbolçunun təxribatla məşğul olması və ya bilərəkdən zəif oynaması halları klubumuzda yolverilməzdi. Ümumiyyətlə, belə xoşagəlməz hal yoxdu. Düşünürəm ki, bəzi futbolçular, o cümlədən qırmızı vərəqə alanlar həddən çox istəkli olduqlarına görə oyunları alınmır. Çünki məqlərdə olduqca istəklidilər.

- Legionerlərin əvəzedici komandaya göndərilməsini necə izah edərdiz?
- Bu vaxta kimi yalnız iki legioner – Luvaqa Kizito ilə Kardoso Fakundo əvəzedici heyətə göndərilib. Onlar zəif çıxışa görə bu aqibəti yaşayıb. Ümumiyyətlə, bizdə istər legioner, istərsə də yerli futbolçular olsun, zəif çıxış edirsə və ya oyun praktikasından əziyyət çəkirsə, dərhal "Səbail-2"yə göndərilir. Burda təəccüblü nəsə yoxdu.

- Mahmud Qurbanov 12 tur ərzində intizamsızlıq edən və zəif çıxışla yadda qalan futbolçuların cərimə olunacağını söyləyib. Buna münasibətiniz?
- Bizdə cərimə cəzası var. Ona görə də baş məşqçi bunu hansı futbolçuya şamil edəcəksə, onun qərarını təsdiq edəcəyik. Bu tək maddi yox, başqa cəzalara da aiddi.

- Mahmud Qurbanovun qışda komandadan göndəriləcəyi ilə bağlı iddialar var. Bu nə dərəcədə doğrudu?
- Biz Mahmud müəllimə və futbolçularımıza güvənirik. Ona görə də baş məşqçimizlə yolları ayırmaq fikrimiz yoxdu.

- Mövsüm ərəfəsində komandanın qarşısına hansı hədəf qoyulmuşdu və 12 turdan sonrakı məqsədiniz nədi?
- Yuxarıda qeyd etdiyimi kimi, komandanı yenidən qurduq. 6-7 ayın komandasıyıq. Qarşımıza çempion olmaq, ilk "4-lüy"ə düşmək, avrokuboka vəsiqə qazanmaq öhdəliyi qoyulmayıb. Əsas məqsəd döyüşkən, xarakterli, gözəl oyun sərgiləyən komanda formalaşdırmaq və yaxşı nəticələr qazanaraq maksimum irəli getməkdi.

- Sizcə, komanda bu gedişlə yaxşı nəticələr qazanacaq?
- Mən buna inanıram. Yuxarıda qeyd etdiyim kimi, oyun planında yaxşıyıq. Maksimum yaradıcı futbol oynayan, irəlidə qol axtarışında olan komandayıq. Bizim üçün də əsas sadaladıqlarımdı. Yaxşı oyun sərgiləyiriksə, gec-tez nəticələr gələcək. Hər qarşılaşmaya ciddi hazırlaşır, meydana baxımlı oyun sərgiləmək üçün çıxırıq. İnanıram ki, qarşıdakı turlarda gözəl oyunumuzla qələbələr qazanacağıq.

- "Səbail"in Mingəçeviri təmsil edəcəyi ilə bağlı fikirlər var. Bu nə dərəcədə realdı?
- Dediyinizi mətbuatdan oxumuşam. Bizim belə planımız yoxdu. "Səbail" olaraq, əsas məqsədimiz çempionat oyunlarında uğur qazanmaqdı.

ABDULLA İSMAYILOĞLU