Bu sözləri “Futbol+”ə açıqlamasında Tərlan Əhmədov deyib. Təcrübəli mütəxəssis bu gün keçiriləcək Azərbaycan kubokunun finalı haqda fikirlərini bildirib. Tərlan bəy “Qarabağ”ın görüşün favoriti olduğunu bildirib:

“Qarabağ” premyer-liqanın çempionu oldu, “Zirə” isə 3-cü yeri tutdu. Hər iki klub, matçın nəticəsindən aslı olmayaraq, avrokuboklarda iştirak edə biləcək. Məncə, bu görüşdə şanslar bərabərdi. Təbii ki, “Qarabağ”ı üstün saya bilərik. “Köhlən atlar”ı oturuşmuş heyəti, yüksək büdcəsi, futbolçuların səviyyəsi və fərdi bacarığı, oyun üslubu, çempionatın bombardiri Kadinin heyətdə yer alması da favorit edir. Demək olar ki, çempionatı da birnəfəsə, rahat başa vurdular. “Zirə” isə premyer-liqada bir az qeyri-sabit çıxış etdi. Baxmayaraq ki, bürünc medalçı oldular. Amma daha yaxşı oyun sərgiləyə bilərdilər. Yeni cəlb olunan futbolçular da özlərini istənilən kimi göstərə bilmədilər. Komanda yeni olduğundan, fikrimcə, Rəşad Sadıqov hələ istədiyi kimi formalaşdıra bilməyib. Amma finalda nə “Zirə”nin , nə də “Qarabağ”ın itirəcəyi bir şey var. Hər iki komanda üçün görüşün mahiyyəti fərqlidi. Qurban Qurbanovun kollektivinin “qızıl dubl” etmək şansı var. “Zirə” isə qalib gələcəyi halda tarixində ilk dəfə ölkə kubokunu qazanacaq. Həmçinin Rəşad Sadıqovun da baş məşqçi kimi ilk titulu ola bilər. Hər şeydən əvvəl maraqlı oyunun şahidi olacağımızı düşünürəm. Bir çoxlarımız “Qarabağ”ı favorit görürük. Lakin dediyim kimi, şanslar bərabərdi. Daha çox səhvə yol verən komanda məğlub olacaq. Çünki belə oyunlarda bəzən 1 qol görüşün taleyini həll edir. İstəyirəm ki, məhsuldar oyun izləyək. “Qarabağ” hücum futbolu oynayır. Müdafiədən sürətli çıxır və mübarizəni meydanın rəqibə aid hissəsinə keçirir. “Zirə” isə müdafiəyə üstünlük verir, yəni rəqibi əks-hücumda yaxalamağı sevir. Qurban Qurbanovun komandası topa daha çox sahib olmaq istəyəcək. Son oyunlarda “qartallar”ın da bu sahədə inkişaf etdiyini gördük. Ola bilsin, Rəşad Sadıqovun kollektivi “köhlən atlar”a öz oyununu oynamağa imkan verməsin. “Qarabağ” futbolçularının əsəbləri ilə oynasınlar. Belə də ola bilər ki, tərəflər yaxşı oyunla yox, necə olur-olsun, qələbə qazanmağa çalışsın. Amma məncə, maraqlı futbol izləyəcəyik. Bir tərəf daha çox hücumda olacaq, o biri isə əks-hücumlardan yararlanmağa çalışacaq. Hər iki komandaya uğurlar arzulayıram. Kim layiqdisə, o da qalib gəlsin”.

Qeyd edək ki, “Qarabağ” - “Zirə” matçı bu gün saat 19.00-da Qəbələ şəhər stadionunda baş tutacaq.

SƏNƏM FƏRHADOVA