Bəlkə də 7-8 il əvvəl olsaydı, ötən cümə Qəbələdə keçirilən matç turun mərkəzi qarşılaşması kimi qəbul olunardı. Qarlı və şaxtalı havaya rəğmən, azarkeşlər tribunaları doldurardı. Təəssüf ki, indi nə “Qəbələ” Roman Qriqorçukun dönəmindəki iddialı komandadı, nə də “Neftçi” çempionluğa oynayır. 22-ci turun ilk oyunu Böyük Qafqazın ətəyində keçirildi. O qədər də sürətli keçməyən matç elə başladığı kimi də bitdi. Deyəsən, hər iki komanda meydana məhz 1 xal üçün çıxmışdı.

Qəbələdə baş tutan görüşü qısaca belə səciyyələndirmək olar: “qələbə qazana bilmirəmsə, məğlub da olmayım”.

22-ci turun mərkəzi oyunu isə Suraxınada reallaşdı. Lider “Qarabağ” “Sabah”la üz-üzə gəldi. Bəribaşdan qeyd edək ki, oyun o qədər də parlaq alınmadı. Hər iki komanda qələbə qazana bilərdi, ancaq ədalətli nəticə heç-heçə idi ki, sonda məhz belə də oldu. Bəlkə də “Sabah”ın bir qədər bəxti gətirmədi. Tir və dirəkdən dönən iki zərbə ilə yanaşı, baş hakimin kobud səhvini də nəzərə alsaq, bu görüşdə 2 xal itirən tərəfin “bayquşlar” olduğunu söyləyə bilərik. Komandası xal itirsə də, Musa Qurbanlı bombardirlər yarışında liderliyi ələ keçirdiyinə görə sevinə bilər.

Qərb derbisində isə sevinən tərəf meydan sahibləri oldu. “Turan Tovuz” ilk yarının son saniyələrində və 2-ci hissənin əvvəlində vurduğu qollarla matçın taleyini həll etdi. Bu yenilgidən sonra “sarı-göylər” yenidən turnir cədvəlinin dibinə yuvarlandı. Bəlkə də bu səbəbdəndi ki, gəncəli azarkeşlər Tərlan Əhmədovun istefasını tələb edirlər.

Qış fasiləsindən sonra keçirdiyi 4 görüşün ikisində uduzmasına baxmayaraq, “Sumqayıt”ın oyununda inkişaf sezilir. Samir Abasovun komandası indi daha dinamik və sürətli oyun sərgiləyir ki, “Şamaxı” ilə matçın ilk hissəsində bir daha bunun şahidi olduq. Ancaq fasilədən sonra “kimyaçılar”ın sanki əl-qolunu bağladılar. Bundan yararlanan “şirlər” davamlı pressinq sayəsində “Sumqayıt”a meydanın mərkəzini keçməyə belə imkan vermirdi. Düzü, srağagünkü matçda Abasovun komandasının bəxt sayəsində 3 xal qazandığını vurğulamaq lazımdı. Sumqayıtı məğlub tərk edən bölgə təmsilçisini sonuncu pillədən artıq 2 xal ayırır. Vüqar Əsgərli – Cavid Hüseynov tandeminin çalışdırdığı kollektiv vaxtında toparlana bilməsə, sonuncu yerə yuvarlana bilər.

Demək olar, hər həftə transfer edən, heyəti gücləndirmək yolunda əməlli-başlı pul xərcləyən “Zirə” uğursuzluq zolağından çıxa bilmir. Rəşad Sadıqovun çalışdırdığı komanda bu dəfə “Səbail” qarşısında “ağ bayraq qaldırdı”. Bu enişin nə vaxata qədər davam edəcəyi çox maraqlıdı. Belə getsə, “qaratallar”ın avrokubok arzusu elə arzu kimi də qalacaq.

Misli premyer-liqası
3-cü dövrə, 22-ci tur
10 fevral
Qəbələ - Neftçi 0:0
11 fevral
Turan Tovuz – Kəpəz 2:0
Qarabağ – Sabah 1:1
12 fevral
Səbail – Zirə 2:0
Sumqayıt – Şamaxı 1:0

1. Qarabağ 22 18 4 0 56-13 58
2. Sabah 22 16 5 1 50-14 53
3. Neftçi 22 14 3 5 38-21 45
4. Zirə 22 9 5 8 25-30 32
5. Qəbələ 22 7 7 8 24-25 28
6. Turan Tovuz 22 6 5 11 17-27 23
7. Sumqayıt 22 4 6 12 14-36 18
8. Şamaxı 22 3 7 12 17-34 16
9. Səbail 22 4 4 14 17-36 16
10. Kəpəz 22 2 8 12 19-41 14

Bombardirlər: Musa Qurbanlı (Qarabağ) – 16, Ramil Şeydayev (Qarabağ) – 15, Coy-Lens Mikels (Sabah) – 12, Emin Mahmudov (Neftçi) – 10.
Növbəti turun oyunları: 17 fevral – Kəpəz – Şamaxı; 18 fevral – Qəbələ - Sumqayıt, Neftçi – Səbail; 19 fevral – Sabah – Turan Tovuz, Zirə - Qarabağ.

RƏŞAD