Hesabat turunun ilk oyunu Sumqayıtda keçirildi.

Football-plus.az xəbər verir ki, qış fasiləsindən sonra keçirdiyi ilk oyunda uduzan iki komanda məhz bu şəhərdə üz-üzə gəldi. İlk yarı bərabər səviyyədə keçdi ki, bu da hesabda 'ksini tapdı. “Sumqayıt”ın 28-ci dəqiqədə vurduğu qola “Turan Tovuz” hissənin əsas vaxtının sonuna 5 dəqiqə qalmış cavab verdi. Fasilədən sonra isə meydanda diqtə edən tərəf “kimyaçılar” oldu. Samir Abasovun komandası daha rəngarəng hücumlar qurur, topa nəzarət edirdi. Bunun məntiqi nəticəsi kimi sumqayıtlılar 2-ci yarıda daha bir dəfə fərqlənməklə 2023-də ilk qələbəsini rəsmiləşdirdi. Qələbə sayəsində “kimyaçılar” turnir cədvəlində bir pillə irəliləməklə 8-ci pilləyə yüksəldi. Tovuzlular isə fasilədən əvvəl yığdığı xallar hesabına hələ də 6-cı yerdəki mövqeyini qoruyur. Ayxan Abbasovun komandasını növbəti turda çətin Şamaxı səfəri gözləyir.

“Şamaxı”dan söz düşmüşkən, Vüqar Əsgərli – Cavid Hüseynov tandeminin çalışdırdığı komanda lider “Qarabağ”ın qonağı oldu. Oyundan əvvəl, demək olar, hamı ağdamlıların asan qələbə qazanacağını güman edirdi ki, proqnozlar özünü doğrultdu. “Qarabağ” mövsümdə 18-ci qələbəsini qazanmaqla liderliyini davam etdirir. Çempionatın və komandanın bombardiri Ramil Şeydayev “şirlər”lə görüşdə fərqlənə bilməsə də, bombardirlik yarışında onu qarabaqara izləyən Musa Qurbanlı adını tabloya yazdırmağı bacardı. Artıq Ramili Musadan bir top ayırır. Böyük ehtimalla “Qarabağ” mövsümün sonunda 10-cu çempionluğu qazanaraq, formasına ikinci ulduzu həkk etdirəcək. İndi əsas sual “ən sərrast futbolçu” adını kimin qazanacağıdı. “Şamaxı” isə adlı-sanlı rəqibə boyun əysə də, əzmkarlığına görə stadiona toplaşanların alqışını qazandı. Təbii ki, alqışa görə 3 xal verilmir. Turu xalsız bitirən bölgə təmsilçisi artıq “Sumqayıt”ın isti nəfəsini kürəyində hiss etməkdədi.

İkinci dövrə başa çatandan sonra “Səbail” in baş məşqçisi postuna dəvət olunan Şahin Diniyev yeni komandasında ilk qələbəsini qazandı. “Dənizçilər” “Kəpəz”i evə əliboş yola saldı. Hərçənd Tərlan Əhmədovun komandası məğlubiyyətə layiq oyun sərgiləmədi. Əksəriyyətin fikrincə, ədalətli nəticə heç-heçə idi. Ancaq “qaliblər mühakimə olunmur” prinsipi əsasında meydan sahiblərinin zəfərinə kölgə salmağa dəyməz. Ötən tur Gəncədə heç-heçə edən “Qəbələ” bu dəfə evdə “Sabah”a böyük hesabla uduzmaqla tərəfdarlarını məyus etdi.

Oyunun “qəhrəmanı”, heç şübhəsiz, Ruan Renato idi. Braziliyalı müdafiəçi ilk yarıda meydandan qovulmaqla komandasını pis vəziyyətdə qoydu. Düzdü, Elmar Baxşıyev oyunsonrası mətbuat konfransında futbolçunun “qırmızı”ya layiq olmadığını, hakimin səhvə yol verdiyini bildirdi. Ancaq bu heç nəyi dəyişmir.

Azlıqda qalan meydan sahibləri təxminən bir saat qonaqların təzyiqinə tab gətirdi. Lakin bundan artığını bacarmadılar. “Tələbələr” son yarım saatda “qırmızı- qaralar”ı üç dəfə meydanın mərkəzinə dəvət etdi. “Bayquşlar”ın ulduzu Coy-Lens Mikels isə Qəbələdə fərqlənməklə bombardirlər yarışından qopmaq niyyətində olmadığını göstərdi. “Sabah”ın 11 qolunda onun imzası var.

Və sonda turun mərkəzi qarşılaşması... “Neftçi” özündən bir pillə aşağıda olan “Zirə”ni qonaq etdi. “Qartallar” qələbə sayəsində “ağ-qaralar”a bir qədər də yaxınlaşa bilərdi. Meydan sahibləri isə qələbə sayəsində əsas izləyicisindən uzaqlaşacaqdı. İlk yarısı qolsuz bitən matçda yeganə qol 2-ci yarının əvvəlində vuruldu. Stankoviç “Neftçi”yə hava-su kimi vacib olan qolu vurmaqla komandasına 3 xal qazandırdı. Yeri gəlmişkən, bu oyunda hər iki komandanın heyətində yeni transferlər debüt etdi. “Neftçi”dən Saldanyanın “qazancı” sarı vərəqə oldusa, “Zirə”dən Gerye, ümumiyyətlə, meydandan qovuldu. 75-ci dəqiqədə qarşısında ikinci “sarı”nı görən haitili növbəti turda “Qəbələ” ilə oyunu buraxmaq məcburiyyətindədi ki, bu da Rəşad Sadıqovun planlarına
təsirsiz ötüşməyə bilməz. “Neftçi” qələbə sayəsində “Zirə”ni artıq 10 xal qabaqlayır ki, bu da ciddi fərqdi.

Misli premyer-liqası

3-cü dövrə
20-ci tur

30 yanvar
Sumqayıt – Turan Tovuz 2:1

31 yanvar
Qarabağ – Şamaxı 3:1
Səbail – Kəpəz 1:0

1 fevral
Qəbələ - Sabah 0:3
Neftçi – Zirə 1:0

1. Qarabağ 20 18 2 0 54-11 56
2. Sabah 20 15 4 1 45-13 49
3. Neftçi 20 13 2 5 36-21 41
4. Zirə 20 9 4 7 23-26 31
5. Qəbələ 20 7 5 8 22-23 26
6. Turan Tovuz 20 4 5 11 14-27 17
7. Şamaxı 20 3 7 10 17-32 16
8. Sumqayıt 20 3 6 11 13-34 15
9. Səbail 20 3 4 13 15-32 13
10. Kəpəz 20 2 7 11 18-38 13

Bombardirlər: Ramil Şeydayev (Qarabağ) – 15, Musa
Qurbanlı (Qarabağ) – 14, Coy-Lens Mikels (Sabah) – 11.
Növbəti turun oyunları: 4 fevral – Kəpəz – Qarabağ;

5 fevral – Zirə - Qəbələ, Neftçi – Sumqayıt;
6 fevral – Şamaxı – Turan Tovuz, Sabah – Səbail.

RƏŞAD