Rəqiblərindən bir oyun az keçirən, bununla belə, yüzfazilik nəticə ilə turnir cədvəlinin zirvəsində qərarlaşan “Qarabağ” 12-ci turda da azarkeşlərini sevindirdi.

Football-plus.az xəbər verir ki, Qurban Qurbanovun komandası bu dəfə “Şamaxı”nı böyük hesabla yendi. Musa Qurbanlının dubl etdiyi görüşdə bütün qollar 2-ci hissədə vuruldu. Bu qələbə sayəsində xal sayını 33-ə çatdıran “köhlən atalar”la ikinci pillədəki “Sabah” arasında xal fərqi 2-yə bərabərdi.

“Sabah”dan söz düşmüşkən, mükafatçılar sırasına düşməyə iddialı komanda az qala “Qəbələ” ilə qarşılaşmada xal itirəcəkdi. İlk yarıda hesabda geri düşən meydan sahibləri yalnız 63-cü dəqiqədə “status-kvo”nu bərpa edə bildi. “Sabah”a 3 xal gətirən qolu isə 90+3-cü dəqiqədə Davit Volkov vurdu. Bu qələbə sayəsində Murad Musayevin komandası ikinci pillədəki mövqeyini qorudu. Yuxarıda qeyd etdiyimiz kimi, “Qarabağ”dan 2 xal geri qalan “tələbələr” 3-cü pillədə olan “Neftçi”dən 6 xal irəlidədi. Masazırda keçirilən görüş bir daha Elmar Baxşıyevin çalışdırdığı “qırmızı-qaralar”ın enişdə olduğunu ortaya qoydu. Bölgə təmsilçisi buna nöqtə qoya biləcəkmi? Bu suala növbəti turda – “Zirə” ilə matçda aydınlıq gələcək.

"Neftçi" bu mövsümdə səfərdə ilk böyükhesablı qələbəsini Zirədə qazandı. Bakıətrafı qəsəbəyə qonaq gedən “ağ-qaralar” heç də özünü qonaq kimi aparmadı. Matçın əvvəlində rəqibini meydanın mərkəzinə dəvət edən bakılılar bir də 2-ci hissənin sonlarına yaxın coşdu. Rəşad Sadıqovun çalışdırdığı komanda isə, yenilməsinə baxmayaraq, tunur cədvəlindəki mövqeyini əldən vermədi. “Qartallar” mövsümdəki 5-ci məğlubiyyətdən sonra da “avrokubok zonası”ndadı.

“Kəpəz” Tərlan Əhmədovun gəlişindən sonra 2-ci qələbəyə sevindi. “Sarı-göylər” “doğma divarlar” arasında “Səbail”ə 3 cavabsız qolla qalib gəldi. Yeri gəlmişkən, gəncəlilər komandalarının premyer-liqada qələbəsini görmək üçün təxminən 4 il gözləməli oldu. Maraqlıdı ki, "Kəpəz" doğma şəhərdə son qələbəni də məhz “dənizçilər” üzərində qazanmışdı. Bu, 2017/08-də - Yunis Hüseynovun baş məşqçiliyi dövründə qeydə alınıb. 2018-ci il martın 3-də "Səbail"i 2:1 hesabıyla məğlub edən gəncəlilər ardından qələbəyə həsrət qalıb və yekunda son pilləni tutaraq 1-ci diviziona düşüb.

Turun açılış oyunu isə Tovuzda keçirildi. “Turan Tovuz” “Sumqayıt”ın qapısına 88-ci dəqiqədə yol tapdı. Hazırda hesabında 15 xal olan “boz qurdlar” ən yaxın izləyicisi “Səbail”i 5 xal qabaqlayır, 5-ci pillədəki “Qəbələ”dən isə 2 xal geri qalır. “Sumqayıt”ın qələbəsiz seriyası artıq 12 oyuna çatdı. 12 oyuna cəmi 2 qol vurması da komandanın bərbad durumundan xəbər verir. Bir sözlə, Samir Abasov da hələ ki papağını günə yandırır.

Misli premyer-liqası
2-ci dövrə, 12-ci tur
28 oktyabr
Turan Tovuz – Sumqayıt 1:0
29 oktyabr
Kəpəz – Səbail 3:0
Zirə - Neftçi 0:3
30 oktyabr
Şamaxı – Qarabağ 0:4
Sabah – Qəbələ 2:1
1. Qarabağ 11 11 0 0 35-7 33
2. Sabah 12 10 1 1 28-10 31
3. Neftçi 12 8 1 3 24-12 25
4. Zirə 12 6 1 5 15-20 19
5. Qəbələ 12 5 2 5 16-13 17
6. Turan Tovuz 11 4 3 4 9-13 15
7. Səbail 12 2 4 6 11-17 10
8. Kəpəz 12 2 2 8 10-26 8
9. Şamaxı 12 0 4 8 5-20 4
10. Sumqayıt 12 0 4 8 2-17 4
Bombardirlər: Ramil Şeydayev, Musa Qurbanlı (hər ikisi “Qarabağ”) – 10, Coy-Lens Mikels (Sabah) – 7.
Növbəti turun oyunları: 4 noyabr – Turan Tovuz – Şamaxı; 5 noyabr – Sumqayıt – Neftçi, Qəbələ - Zirə; 6 noyabr – Səbail – Sabah, Qarabağ – Kəpəz.
RƏŞAD