"Azarkeşlərin çoxu Amin Ramazanova əcnəbi qapıçı kimi baxır, ona bir qədər güvənsizlik var. Bunun da səbəbi odu ki, daim qapı xəttində Şahruddin Məhəmmədəliyevi görməyə öyrəşiblər. Amma məsələyə peşəkar yöndən yanaşsaq, əvəzolunmaz futbolçu yoxdu. Bu eynilə qapıçılara da aiddi. Biz yalnız kənardan nələrisə görüb fikir bildirə bilərik. Hər şeyi daha dəqiq Qurban Qurbanov bilir. O, təlim-məşq toplanışındakı qarşılaşmalarda və çempionatın 3 oyununda Aminə şans verirsə, deməli, gənc qolkiperin bacarığına bələddi. Ramazanovun qapıçıya xas fiziki göstəriciləri var. İki ildən çoxdu "Qarabağ"dadı. Hətta U-21 millimizə də çağrılıb. Bu gün Ağdam təmsilçisinin start heyətində yer alması futbolumuzun inkişafına təkandı. Potensialı olan bütün gənclərə güvənilməli, şans verilməlidi. Necə ki, Musa Qurbanlıya şans verildi və o özünü yaxşı tərəfdən göstərərək hazırda çempionatımızın bombardiridi. Həmçinin Amin başda olmaq digər oyunçulara da şans tanımaq lazımdı. Dünya futbolunda o qədər gənc qolkiper olub ki, çempionatnda çox da şans qazanmayıb, birbaşa qitəmiqyaslı turnirlərdə oynamaqla ulduza çevrilib. Belə çox nümunə çəkmək olar. Futbolumuzda da belələri olub. Vaxtilə Sumqayıt "Gənclərbirliyi"ndə heç kimin tanımadığı Fərhad Vəliyev vardı. "İnter"ə keçəndən sonra parladı, sonra milli komandaya cəlb olundu və bir müddət "1 nömrə" oldu. Hazırda "Sabah"da Yusif İmanov, gənc olmasına rəğmən, komandasının əsas qapıçısıdı. Amin Ramazanovun da onlar kimi inkişaf edəcəyinə inanmalıyıq. Düzdü, keçirdiyi hər oyunda qapısından qollar buraxıb. Bu da onun təcrübəsizliyi ilə bağlıdı. Amma əminəm ki, zamanla daha yaxşı forma yığmaqla seyvləri ilə hamımızı sevindirəcək. "Gent"lə oyunda da qapıda görsək, təəccüblənməməli və ona inanmalı, dəstək olmalıyıq. Fikrimcə, Belçika təmsilçisiylə matçda özünü yaxşı tərəfdən göstərməklə qələbədə pay sahiblərindən biri olacaq".

"Qapı xəttində kimin yer almasını ən yaxşı Qurban müəllim bilir. Mənim fikrimə gəlincə, Luka Quqeşaşvili qapıçı kimi uğursuz transferdi. Nəinki Şahruddini, heç Amini də əvəz edə bilmədi. Gürcü qapıçı bu mövsüm "Qarabağ"ın heyətində çox oynasa da, onun çıxışı fiaskodan başqa bir şey deyil. Onun etdiyi səhvləri heç 10 yaşlı qapıçı etməz. Amin Ramazanova gəlincə, fiziki göstəriciləri, görünüşü qapıçı üçün əlverişlidi. Amma bu gün ondan çox şey gözləmək düzgün deyil. Gənc qolkiper praktika azlığı üzündən oyunlarda texniki səhvlərə yol verir. Düşünürəm ki, o hələ son çempionun qapı xəttində yer almağa layiq deyil. Amma perspektivli qapıçıdı. Mövsümün əvvəlində oyun praktikası qazanmaq üçün hansısa kluba icarəyə verilsəydi, daha yaxşı olardı. Amma Quqeşaşviliylə müqayisədə Aminə şans verilməsinin tərəfdarıyam. Legioner kobud səhvlərlə yadda qalırsa, yerli gənc qapıçını oynadıb həm komandaya, həm də ölkə futboluna qazandırmaq daha yaxşıdı. Amin hazırda gürcüdən daha hazırlıqlıdı. Amma yenə də ona bütün oyunlarda şans vermək riskdi. İndiki halda başqa çıxış yolu yoxdu. Şahruddin sıradan çıxdı, yeni qapıçı transfer olunmadı, Quqeşaşvili etimadı doğrultmadı. Ona görə də yeganə ümid hazırda gənc qolkiperədi. Yayda "Qarabağ" mütləq güclü qapıçı transfer etməlidi. Əminəm ki, Qurban müəllim bunu hamıdan yaxşı anlayır və klubun seleksiyaçıları axtarışdadı".