"Quqeşaşvilinin yerinə gənc Amin Ramazanova şans verilsə, daha yaxşı olardı"
"Qarabağ"ın və yığmamızın əsas qapıçısı Şahruddin Məhəmmədəliyev yanvarın 16-da məşq zamanı biləyini sındırıb.
Football-plus.az xəbər verir ki, əməliyyat olunacaq qolkiperin nə vaxt sıraya dönəcəyi də dəqiq deyil. Qarşıdan premyer-liqanın 2-ci yarısı, Konfrans Liqasında "Gent"lə oyunlar və millinin toplanışının olduğunu nəzərə alsaq, qapıçının yoxluğu həm Ağdam təmsilçisi, həm də ölkənin əsas komandası üçün ciddi itkidi. Belə olan halda Şahruddini kim əvəzləyə bilər? Bunu aydınlaşdırmaq üçün təcrübəli veteran qapıçı Hüseyn Məhəmmədovun fikrini öyrəndik:
"Şahruddin Məhəmmədəliyev həm "Qarabağ"ın, həm də millimizin əsas qapıçısıdı. Onun məşq zamanı zədələnməsi ciddi itkidi. Hamımız üçün üzüntülü haldı. Düşünürəm ki, onu əvəz edəcək qapıçılarımız var. Emil Balayev, Mehdi Cənnətov, Səlahət Ağayevi və başqa qapıçıların adını çəkə bilərəm. Düşünürəm ki, həmin qolkiperlər üzərinə düşən məhsulliyyəti daha yaxşı anlamalıdı. Çoxları deyir ki, Şahruddin yoxdusa, batdıq. Mən bu yanaşmayla razı deyiləm. Düzdü, bir müddət oldu ki, ölkə futbolunda ciddi qapıçı qıtlığı yarandı. Nə qədər gənc qapıçı futboldan uzaqlaşdı. Bir çoxları vaxtından əvvəl karyerasını bitirdi. Amil Ağacanov, Əsədulla Əliyev, Ruslan Məcidov və başqalarını nümunə göstərə bilərəm. Bunun əsas səbəbi legioner qapıçılara hədsiz güvənmək idi. Halbuki onların çoxu bizim qolkiperlərdən heç də üstün deyildi. Baxın, gürcü Georgi Lomaya 7 ildən çox “İnter”də (indiki "Şamaxı") qapıda dayandı, Stanislav Namaşko uzun müddət "Keşlə"də oynadı. Bu siyahını uzada da bilərəm. Amma onların yerinə neçə-neçə perspektivli gəncə şans verilsəydi, bu gün daha çox qolkiper seçimimiz olardı. Şükürlər olsun ki, son illərdə yaxşı gənclər üzə çıxıb və çıxmaqdadı. Yusif İmanov, Hüseynəli Quliyev və Nicat Mehbalıyevin adını çəkə bilərəm. Bu mövsüm çempionatımızda yerli qapıçılar daha çox şans qazanır. Qurban Qurbanovla birgə çıxış etmişəm və onun xasiyyətinə yaxşı bələdəm. Çoxları onu qınayır ki, Luka Quqeşaşvili çempionatda ən çox şans qazanan qapıçı olsa da, kobud səhvlər edib. Onun yerinə gənc Amin Ramazanova şans verilsə, daha yaxşı olardı. Həm gənc qapıçı təcrübə toplayardı, həm də futbolumuz yeni "əlcək sahibi” qazanardı. Mən hardasa bu fikirlə razıyam. Amma komandanın daxilində hər şeyi baş məşqçi hamıdan yaxşı bilir. Qurban müəllim istedadlı, üzərində çalışan istənilən gənc futbolçuya zamanı gələndə şans verir. Məsələnin başqa tərəfi isə futbolçularımızın, o cümlədən qolkiperlərimizin üzərlərində çalışmamasıdı. Qapı xətti elə mövqedi ki, orda yaşdan çox təcrübə rol oynayır. Təcrübə də daim üzərində çalışmaqla yığılır. Fikir verin, Buffonun 44 yaşı var, amma hələ də üzərində işləyir, formasını saxlayır və daha çox şans qazanmaq üçün məşqlərdə tər tökür. Mən bu yaşımda hərdən yoldaşlarla futbol oynayanda və heç nədən top buraxanda belə etiraz edirəm. İnanın səmimiyyətimə, görsəm ki, mənə ehtiyac var, karyeramı bərpa edib yenidən peşəkar qapıçı kimi oynaya bilərəm. Sadəcə, hazırda daha çox gənc qolkiperləri üzə çıxarmaq, onları yetişdirib ölkə futboluna qazandırmaqda həvəsliyəm. Sözüm gənclər başda olmaqla bütün qapıçılaradı ki, xarakter göstərsinlər, mübariz olsunlar və üzərlərində daim işləsinlər. Karyeramla bağlı daha bir fakt deyim. "Kəpəz"də çıxış edərkən rəhbərlik komandaya daha təcrübəli Nizami Sadıqovu da cəlb etdi. Çoxları düşündü ki, artıq mən ehtiyatda qalacam. Lakin bu baş vermədi. Çünki nə rəqabətdən, nə də Nizami Sadıqovun təcrübəsindən və adından qorxdum. Daim üzərimdə işlədim və komandanın əsas qapıçısı kimi qaldım. Odu ki, futbolçunun özündən, düşüncəsindən, xarakterindən çox şey asılıdı. Bu sadalananlar varsa, mütləq onu irəli çəkəcəklər".
Digər xəbərlər
