Xəyal Zeynalov: “Şahruddini həddən artıq şişirdərək şəxsiyyətinə pərəstiş yaratmışıq”
"Qarabağ"ın və yığmamızın əsas qapıçısı Şahruddin Məhəmmədəliyev yanvarın 16-da məşq zamanı biləyini sındırıb.
Football-plus.az xəbər verir ki, əməliyyat olunacaq qolkiperin nə vaxt sıraya dönəcəyi də dəqiq deyil. Qarşıdan premyer-liqanın 2-ci yarısı, Konfrans Liqasında "Gent"lə oyunlar və millinin toplanışının olduğunu nəzərə alsaq, qapıçının yoxluğu həm Ağdam təmsilçisi, həm də ölkənin əsas komandası üçün ciddi itkidi. Belə olan halda Şahruddini kim əvəzləyə bilər? Bunu aydınlaşdırmaq üçün təcrübəli veteran qapıçı Xəyal Zeynalovun fikrini öyrəndik:
"Bu gün üçün Şahruddin Məhəmmədəliyev Azərbaycanda "1 nömrə" sayılır. Mən onun əziyyətinə, çıxışına və məharətinə kölgə salmaq istəmirəm. Dağıstanlı yaxşı qapıçıdı. Amma onu həddən artıq şişirdərək şəxsiyyətinə pərəstiş yaratmışıq. Şahruddinin ölkə futbolunda üstün qapıçı sayılması "Qarabağ" kimi adlı-sanlı komandada oynaması və Ağdam təmsilçisinin qitəmiqyaslı yarışlarda uğur qazanması ilə birbaşa bağlıdı. Eləcə də iddialı klublarımız, adətən, gənc qolkiperdən çox təcrübəli qapıçıya şans verir. Bu başadüşüləndi, amma gənclərə də şans verilməlidi. Digər ən böyük problemimiz legionerlərə hədsiz marağımız və şans verməyimizdi. Bizdə belə psixologiya var ki, əcnəbi qolkiperə şans versəm, qapı xətti daha etibarlı olar. Ona görə də hələ legioner və “milliləşdirilən” qapıçılara üstünlük verilir. Mən bu düşüncə ilə razı deyiləm. Azərbaycan futbolunda heç vaxt qapıçı problemi olmayıb. Ölkəmizdə Dmitri Kramarenko, Cahangir Həsənzadə, Hüseyn Məhəmmədov, Elxan Həsənov, Fərhad Vəliyev, Kamran Ağayev və adını çəkmədiyim onlarla güclü qapıçı yetişib. Onlar ölkəmizə gəlib-getmiş əksər legioner qapıçılardan üstün olublar. Kifayət qədər gənc, perpektivli qapıçılar var. Mən zaman-zaman bölgələrdə də oluram. Qərb bölgəsində bacarıqlı uşaqlar çoxdu. Sadəcə, onları üzə çıxarmaq, yetişdirmək lazımdı. Bu mövsüm elita komandalarının sayı çoxaldı ki, bununla qapıçılarımızın daha çox oynamaq şansı da artdı. Düşünürəm ki, həm premyer-liqada klubların sayı artırılmalı, həm də 1-ci divizionun səviyyəsi yüksəlməlidi ki, qapıçılar daha çox şans qazansın. Baxın, bu mövsümdən elitaya qayıdan "Kəpəz"lə "Turan Tovuz"un qapısını yerli uşaqlar qoruyur. İstər Tərlan Əhmədli, istərsə də Orxan Sadıqlı öz üzərində işləməklə yaxşı çıxış edir. Təcrübəli Kamal Bayramov, yaşının çoxluğuna rəğmən, penalti dəf edir. Rəşad Əzizli bəlkə də karyerasının yüksəlişini yaşayır. Bütün bunlar onun nəticəsidi ki, şans qazanırlar. Mənə çatmır, Orxan Sadıqlının yaxşı formada olmasına, seyvlər edərək komandasını qollardan xilas etməsinə rəğmən, klub niyə gedib xorvat qapıçı alır? Məgər o yerli qapıçını üstələyəcək? Ümumiyyətlə, böyük iddiası olmayan, avrokuboklara vəsiqə uğrunda mübarizə aparmayan komandalar niyə əcnəbi qapıçılara şans verməlidi? Uzun sözün qısası, Azərbaycanda yetərincə gənc, təcrübəli qapıçılar var. Sadəcə, şans verilmir. Klubları onlara şans verməyə çağırıram".
ABDULLA İSMAYILOĞLU
Digər xəbərlər
