Misli premyer-liqasının 19-cu turunda, səfərdə "Zirə"ylə oyunda zədələnən Vurğun Hüseynov hələ də zədəsini sağaltmaqla məşğuldu.

Buna baxmayaraq, 34 yaşlı futbolçu "Şamaxı" ilə matçda komandasını tək buraxmamışdı. Oyunu izləyənlər arasında olan "kimyaçılar"ın kapitanıyla hakimin final fitindən sonra danışdıq.

- Zədən nə yerdədi?
- Sağalmaq üzrədi. Artıq komandayla birgə məşqlərə qatılıram. İnşallah, qarşıdakı oyunlarda şans qazanacağıma inanıram.

- "Şamaxı" ilə oyun haqda fikirlərin maraqlıdı.
- Bəlkə də çempionatda ən ağır, çox güc sərf etdiyimiz oyunlardan birini keçirdik. Rəqib yerli futbolçulardan qurulsa da, kreativ futbol sərgiləyir. "Şamaxı" istənilən komandaya başağrı olmağı bacarır. Bizə qarşı da son dərəcə istəkli, aqressiv oynadılar. Matçboyu çətin anlar yaşadıq. Şükürlər olsun ki, ehtiyatlı oyunla rəqibin təzyiqinə tab gətirib, meydana qələbəylə tərk etdik. Vüqar müəllimlə Cavid müəllimin işi göz önündədi. Həqiqətən çox yaxşı, döyüşkən kollektiv yaradıblar. Komanda yoldaşlarımı da sərgilədikləri oyun və qələbə münasibətiylə təbrik edirəm.

- Komandaya yeni qoşulan legionerlərlə bağlı nə deyə bilərsən?
- Ancaq xoş sözlər deyə bilərəm. Hər biri yaradıcılıq potensialı olan futbolçudu. Komandaya pis qoşulmayıblar. Bugünkü matçda Kərim Abubakar qol hesabını açdı. Bu həm özü, həm də bizim üçün xoş haldı. Murata meydanın hər yerində mübarizə apardı, faydalı iş əmsalı ilə diqqəti çəkirdi. Tisdel rəqib müdafiəsini təzyiq altında saxlayırdı. Marafon hələ uzundu. Ona görə də yeni legionerlərimizin daha yaxşı oyun sərgiləcəyinə inanıram.

- Sonuncu pilləni tutan komanda elitanı tərk edəcək. Bu məqam oyunlarda daha mübariz olmağınıza təsir edir?
- Turnir cədvəlindəki vəziyyətimizdən razı ola bilmərik. Durumu yaxşılaşdırmaq üçün əlimizdən gələni edəcəyik. İkinci "5-lik" komandaları arasında amansız mübarizə gedir. Bu mübarizə son tura kimi davam edəcək. Birinci diviziona yuvarlanmaq təhlükəsi ikinci "5-lik" komandalalarını ölüm-dirim mübarizəsi aparmağa səsləyir. Bizi qarşıdakı 14 turda bir-birindən gərgin, maraqlı oyunlar gözləyir. Çalışacağıq ki, bu mübarizədən üzüağ çıxaq.
- Son 4 oyunda 2 qələbə, 2 məğlubiyyətə imza atmısız. Daha yaxşı nəticə göstərmək olardı?

- Hər oyuna sonuncu matçımıza çıxan kimi çıxırıq. Hər bir rəqiblə qarşılaşmada xallar qazanmağı hədəf qoymuşuq. Uduzduğumuz matçlara da baxsaz, görərsiz ki, qorxaq futbol oynamamışıq. Sadəcə, ya öz səhvlərimiz, ya hakimlərin yanlış qərarları, ya da bəxtsizlik üzündən yenilmişik. Təslim olmayacaq, elitada qalmaq üçün əlimizdən gələni edəcəyik.

ABDULLA İSMAYILOĞLU