"Şamaxı" doğma meydanda "Zirə" ilə qolsuz heç-heçə etməklə məğlubiyətsizlik seriyasını 5 oyuna çatdırdı.

Bunda, təbii ki, komandanın baş məşqçisi Cavid Hüseynovun əməyi böyükdü. "Qartallar"la qarşılaşmadan sonra gənc mütəxəssislə söhbətləşmək qərarına gəldik.

- Bu gün doğma meydanda "Zirə"ylə qarşılaşdız. Komanda sona qədər döyüşərək növbəti xalını qazandı. Oyunla bağlı fikirləriniz maraqlıdı.
- "Zirə" ilə qarşılaşmanın çətin olacağını əvvəlcədən bilirdik. Buna baxmayaraq, mübarizə aparmaqla xal və xallar qazanacağımıza da inanırdıq. Son bir həftədə futbolçularımıza da bunu aşılayırdıq. Şükürlər olsun, bu gün meydanda döyüşməklə növbəti uğurlu matçımızı keçirdik. Komandada oyun planında inkişaf var. Amma futbolçularımız bundan da yaxşı çıxış edə bilərlər. Qarşıdakı məşqlərimizdə performansımızı daha da artıracağıq.

- Məğlubiyyətsiz oyunlar seriyası 5-ə çatdı. Artıq bütün komandalar sizdən çəkinir. Cavid Hüseynov - Vüqar Əsgərli duetinin uğuru nədədi?
- (gülür) Hələ ciddi uğurlar üçün heç nə etməmişik. Sadəcə, bir az fərqli pəncərədən baxırıq. Hər gün ən azı 10 dəqiqə futbolçulara fərdi və ümumi inkişafa nail olmaq üçün daha çox çalışmağı və uğura inanmağı aşılayırıq. Hamılıqla "Şamaxı"da yaxşı ab-hava yaratmışıq. Həvəsdən düşmürük, qarşımıza qoyulan məqsədə çatmaq üçün var gücümüzlə mübarizə aparırıq. Qarşıda uzun yol var, hələ heç nə etməmişik. Görüləcək çox işimiz var. Fərqli uğurlar, zəfərlər gözləyirik. İnşallah, buna da nail olacağıq.

- Son matçlarda Kamran Quliyevlə Rövşən Şahmuradovun çıxışında inkişaf hiss olunur. Gənc futbolçuların performansından razısız?
- Rövşən “Şamaxı”ya keçənə qədər heç də yaxşı formada deyildi. Onun performansında axsamalar vardı. Buna baxmayaraq, üzərində işləyən və tənqidlərdən nəticə çıxaran oyunçudu. Həmin sözləri Kamran haqda da demək olar. Heyətimizdəki oyunçuların çoxu aşağı liqadan və əvəzedici komandalardan gəlib. İstər hazırlıq prosesində, istərsə də məşqdən sonrakı yığıncaqlarımızda hər bir futbolçunun çatışmazlıqlarını təhlil edirik. Hətta onlara lövhələr üzərində qeydlər etməklə də səhvlərini anladırıq. Bununla fərdi və komanda şəklindəki nöqsanları aradan qaldırmaqla sürətli inkişafa nail olmağı hədəfləyirik. Təbii ki, hücum xəttində görüləcək işlərimiz çoxdu. Bizə meydana sonradan çıxıb hücum və yarımmüdafiə xəttini gücləndirməklə oyunun taleyini həll edə biləcək futbolçular lazımdı. Hələ ki yetirmələrim komanda şəklində müdafiə olunmaq, hesabı qorumaq üçün güc sərf etməklə özlərini doğruldurlar.

- Uzun müddətdən sonra Kamal Mirzəyevlə Asim Əlizadəyə şans verdiz. Onların çıxışından razı qaldız?
- "Zirə" son 12 dəqiqədə təzyiqi artırdı, məhz rəqibin sürətli hücumlarının qarşısını almaq, top saxlamaq üçün Kamalla Asimə şans verdik. Hər ikisi bacardıqlarını etdilər, çıxışlarından razı qaldım.

- Amil Yunanov artıq komanda ilə birgə məşqlərə başlayıb. "Neftçi"ylə matçda ona şans veriləcək?
- Sevindirici haldı ki, Amil zədəsini tam sağaldaraq komanda ilə məşqlərə qoşulub. Fəallığı ilə seçilir, amma risk etmək istəmirik. Məqsədimiz çempionatın ikinci yarısında Amilin potensialından istifadə etməkdi. İnanıram ki, qış toplanışında daha yaxşı forma yığacaq.

- "Neftçi" hazırda yaxşı günlərini yaşamır, komandada psixoloji durum qaydasında deyil. Məhz bundan istifadə etməklə "ağ-qaralar"ı məyus etməyi hədəfləyirsiz?
- "Neftçi" həm ad-sanına, həm də heyətinə görə çempionatımızın güclü komandalarındandı. Onlarla qarşılaşmada əlimizdən gələni edəcəyik ki, yaxşı nəticəylə qayıdaq.

- Dünya çempionatında hansı komandanın qalib olacağını düşünürsüz?
- Sürprizlərlə zəngin mundial izləyirik. Çoxları kimi mən də Braziliyanı finalda görürdüm. Amma Xorvatiya onları çempionatdan kənarlaşdırdı. Hazırkı vəziyyətdə Fransanı daha şanslı görürəm. Amma futboldu, hər şey ola bilər.

ABDULLA İSMAYILOĞLU