Bugünlərdə İspaniyanın “El Mundo” nəşri Kriştiano Ronaldonun sabiq agenti Jorje Mendeşlə münaqişəsinə aid böyük əks-səda doğuran yazı dərc edib. Bu iki şəxs yaxınlarda ayrılıb – portuqaliyalı ulduzun dünya çempionatı ərəfəsində Pirs Morqana verdiyi qalmaqallı müsahibədən sonra. Ronaldo “Əl-Nəssr” ilə müqaviləni artıq 20 il ərzində əməkdaşlıq etdiyi köhnə dostunun yardımı olmadan bağlayıb.

Football-plus.az xəbər verir ki, yazıda bütün başqa məqamlarla yanaşı, o da qeyd olunur ki, Kriştiano Messinin “Barselona”dakı qazancından xəbərdar idi, ümumiyyətlə, “Real”dakı karyerası boyunca əsas rəqibinin aldığı pulu diqqət mərkəzində saxlayıb. Hətta “Qızıl top”un 2018-ci ildəki təqdimat mərasimində birbaşa Jozep Bartomeudan argentinalının nə qədər aldığını soruşub. “Barselona”nın prezidenti suala belə cavab verib: “Dəqiq deyə bilmərəm, ancaq “Real”ın sənə ödədiyindən iki dəfə çox alır”.

“El Mundo”nun yazdığına görə, bu dialoqdan az sonra Ronaldo “Real”ı tərk etməyə qərar verib və “Yuventus”a keçib. Bu hadisənin gerçəkdən olub-olmadığına dair mühakimə yürütmək çətindi, hər halda, bizə Ronaldo və Messinin illər üzrə gəlirini müqayisə etmək üçün əlavə əsas verir. Gerçəkdən “Barsa” Leoya Kriştianonun aldığından çox pul verib?

2004-cü ildən, yəni Messi “Barselona” ilə ilk peşəkar müqaviləsinin imzaladığı vaxtdan bəri müqayisə aparacağıq. Kriştiano onda tədricən “Old Trafford”da möhkəmlənirdi, hələ “Mançester Yunayted”in liderlərindən biri deyildi. Əvəzində yaxşı pul alırdı ki, bu da transfer üzərində həvəslə çalışan Mendeşin əməyi idi. “Yunayted”də Ronaldonun maaşı ilk dəfə 2007-də artdı, yəni illik 2,1 milyon avrodan 7 milyon avroya çatdı. Messinin qazancı isə peşəkar səviyyədə keçirdiyi ilk illərdə həndəsi silsilə üzrə artırdı: 0,5 milyon, 1,2 milyon, 2,4 milyon, 4,8 milyon. 2008/09 mövsümündəki zəfərdən sonra argentinalı artıq dünyaca məşhurluq və uyğun qonorar (hətta Kriştianonun MY-də aldığından da çox) qazandı. Portuqaliyalının İspaniyadakı ilk iki mövsümündə Leo ondan bir qədər çox qazanmağa davam edirdi. Ancaq 2014-cü ildə Ronaldo “Qızıl top”la yanaşı, “Real”dan yeni müqavilə təklifi də aldı və bu özünəməxsus rəqabətdə irəli çıxdı. “Forbes”in rəqəmlərinə inansaq, o, 2018-ci ilə qədər Messidən bir qədər çox qazandı. Ancaq həmin il hər şey dəyişdi. İş ondadı ki, Leo ağlasığmaz şərtlərlə “Barsa” ilə yeni müqavilə bağladı. Hər şeydən belə görünür ki, “El Mundo”nun yazısında yer alan dialoq da həmin dövrə aiddi (onda Messi ildə 76 milyon, Kriştiano 55 milyon avro qazanırdı). Argentinalı həmin vaxt həqiqətən portuqaliyadan çox qazanmağa başlayıb, amma daha iki dəfə artıq yox. Ronaldo “Real”dan gedəndən sonra qazanc baxımından Leoya çatmadı, hərçənd “Yuve” onun üçün ciddi məbləğ ayırmışdı. Portuqaliyalı “Əl-Nəssr”ə keçənə qədər argentinalıdan az qazanırdı. Amma indi dəfələrlə artıq qazanır.

2011-ci ildə Messi və Ronaldo il ərzində ən çox qazanan idmançıların “10-luğ”una daxil olub. Bütün bu müddət ərzində yalnız bir futbolçu ulduz tandemi qabaqlaya bilib – 2012-ci və 2013-cü illərdə Devid Bekhem bunu bacarıb. Siyahıda əməkhaqqı ilə yanaşı, sponsorluq müqavilələri və imic hüquqlarının satışından gələn pul da nəzərə alınır. Əlbəttə, bütün məbləğləri yüzdəyüz dəqiqliklə hesablamaq çətindi, ancaq təxmini ümumi qazancı müəyyənləşdirmək olar. Hesabata düşən 11 il ərzində Ronaldo 7 dəfə Messini arxada qoya bilib. Ancaq 2018-dən bəri Leo Kriştianonu qabaqlayıb və yaxın vaxtlara qədər hər il (koronavirus dövrü, 2020-ci il istisnadı) əsas rəqibindən çox qazanıb.

Messi ilə Ronaldonun illər üzrə maaşı
Messi il Ronaldo
0,5 2004 2,1
1,2 2005 2,1
2,4 2006 2,1
4,8 2007 7,0
7,8 2008 7,0
12,0 2009 10,7
12,0 2010 11,0
12,0 2011 14,0
18,0 2012 18,0
18,0 2013 20,0
38,0 2014 46,0
46,0 2015 47,0
48,0 2016 50,0
48,0 2017 52,0
76,0 2018 55,0
83,0 2019 58,0
65,0 2020 54,0
87,0 2021 63,0
67,0 2022 54,0
68,0 2023 20,0
Vergi çıxılana qədər. Milyon avro ilə

Messi ilə Ronaldonun maaşının ümumi məbləği
Messi il Ronaldo
- 2003 0,2
0,5 2004 2,3
1,7 2005 4,4
4,1 2006 6,5
8,9 2007 13,5
16,7 2008 20,5
28,7 2009 31,2
40,7 2010 42,2
52,7 2011 56,2
70,7 2012 74,2
88,7 2013 94,2
126,7 2014 140,2
172,7 2015 187,2
220,7 2016 237,2
268,7 2017 289,2
344,7 2018 344,2
427,7 2019 402,2
492,7 2020 456,2
579,7 2021 519,2
646,7 2022 573,2
714,7 2023 773,2
Vergi çıxılana qədər. Milyon avro ilə

Messi ilə Ronaldonun ümumi gəlirlərinin “Forbes” reytinqində müqayisəsi

Messi il Ronaldo
30 (10) 2011 35 (7)
35 (11) 2012 39 (9)
38 (10) 2013 40 (9)
60 (4) 2014 73 (2)
68 (4) 2015 73 (3)
75 (2) 2016 80 (1)
73 (3) 2017 85 (1)
100 (2) 2018 99 (3)
115 (1) 2019 100 (2)
95 (3) 2020 96 (2)
120 (2) 2021 110 (3)
120 (1) 2022 105 (3)

Milyon avro ilə. Mötərizədə “Forbes”in idmançılar üzrə reytinqində yeri göstərilib.