Son 15 ilin iki ən məşhur futbolçusu - Lionel Messi ilə Kriştiano Ronaldo yenidən üz-üzə gəliblər. Yanvarın 19-da keçirilən yoldaşlıq matçına maraq çox böyük olub.

Səudiyyə Ərəbistanında yerli “Əl-Nəssr” və “Əl-Hilal”ın oyunçularından ibarət komanda ilə PSJ arasında çoxdan planlaşdırılan oyun keçirilib. Messi PSJ-nin, Ronaldo isə “Əl-Nəssr”in futbolçusu kimi yığma komandanın heyətibində meydana çıxıb. Paytaxt Ər-Riyaddakı “Kral Fəhd” stadionunda keçirilən görüş PSJ-nin 5:4 hesablı qələbəsi ilə başa çatıb. Messi 1, Ronaldo 2 qol vurub. Lionel ilə Kriştiano, həmçinin PSJ-nin digər aparıcı hücumçuları Neymarla Kilain Mbappe 62-ci dəqiqədə əvəzləniblər. Maraq üçün Messi ilə Ronaldonun sonuncu dəfə 771 gün əvvəl qarşılaşdıqlarını xatırladaq. 2020-ci il dekabrın 8-də Messinin formasını geydiyi “Barselona” evdə Ronaldolu “Yuventus”a 0:3 hesabı ilə məğlub olub. Bəzi mənbələr PSJ-nin bu oyun üçün 10 milyon avrodan çox gəlir əldə edəcəyini xəbər vermişdi.

Ronaldo yoldaşlıq görüşünün ən yaxşı oyunçusu seçilib. Parislilərlə oyunda 34-cü (penalti) və 45+6-cı dəqiqələrdə qol vuran portuqaliyalı hücumçu matçdan sonra özünün sosial şəbəkə hesablarında paylaşım edib. 37 yaşlı futbolçu oyundan şəkillər paylaşıb və belə yazıb: “Meydana qayıtdığım və qollar vurduğum üçün çox xoşbəxtəm! Köhnə dostları görmək çox xoş idi!”