Kriştiano Ronaldonun “Əl-Nəssr”ə keçidi üzrə danışıqların onun agenti Jorje Mendeşin iştirakı olmadan aparıldığını xəbər vermişdik. Onlar arasındakı əməkdaşlığın dayandırılmasının səbəbi məlum olub.

“El Mundo Deportivo” qəzetinin yaydığı xəbərə görə, portuqaliyalı hücumçu ötən ilin noyabrında “Mançester Yunayted”dən ayrılandan sonra agentindən onun “Bavariya” və ya “Çelsi”yə keçidini təmin etməsini istəyib. Ronaldo bu şərti yerinə yetirilməyəcəyi halda əməkdaşlığı dayandıracağını bildirib. Mendeş ulduz futbolçuya bu şərtinə cavab kimi onun “dəli olduğunu” söyləyib. Nəticədə 37 yaşlı Kriştianonun “Əl-Nəssr”ə transferi məşhur agentin vasitəçiliyi olmadan reallaşıb.

Dekabrın 30-da Səudiyyə Ərəbistanı klubu ilə 2,5 illik müqavilə imzalayan Ronaldonun oğlu Junior Ronaldo Ər-Riyaddakı akademiyada məşqlərə başlayıb. “The Sun” qəzetinin xəbərində 12 yaşlı futbolçunun Səudiyyə Ərəbistanının milli idman mərkəzi olan Məhd Akademiyasına yazıldığı bildirilib. Kiçik Ronaldonun oyunu məşqçilər heyətini o qədər heyran edib ki, özündən 2 yaş böyüklərin qrupina daxil edilib.

Onu da qeyd edək ki, “Əl-Nəssr” rəhbərliyi Kriştianonun karyerasını Səudiyyə Ərəbistanında başa vurmasını istəyir. Portuqaliyalı hücumçunun klubla müqaviləsinin müddəti 2025-ci ilin iyununa qədərdi. ESPN-in xəbərinə görə, anlaşma qüvvədən düşəcəyi vaxt futbolçunun 40 yaşı olacaq. “Əl-Nəssr” rəhbərliyi hesab edir ki, Ronaldonun karyerasını başqa liqada başa vurmaq ehtimalı azdı. Müqavilənin müddəti başa çatdıqdan sonra karyerasını davam etdirmək istəsə, klub ona yeni təklif irəli sürə bilər.