Rusiya "Rodina”sının futbolçusu Ruslan Fişenko millimizdə oynamaq üçün bir neçə dəfə təklif alıb.

Football-plus.az xəbər verir ki, 22 yaşlı yarımmüdafiəçi bu haqda 1-ci divizion təmsilçisinin saytına açıqlamasında deyib.

Onun səsləndirdiyi fikirlər birmənalı qarşılanmayıb:

"İndi də hesab edirəm ki, “Qarabağ” ÇSKA-dan zəif deyil. Komanda müntəzəm avrokuboklarda çıxış edir, orda vaxt keçirmir, həqiqətən oynayır. ÇSKA-dan “Qarabağ”a getdim. Mənə əvvəlcə yoxlama görüşündə Azərbaycan millisində çıxış etməyi təklif etdilər. Rəsmən oynaya və vətəndaşlıq ala bilərdim. Lakin həmişə oynamağa can atdığım Rusiya premyer-liqasında legioner olmaq istəmirdim".

Görəsən, AFFA həqiqətən Ruslanla maraqlanıb? Onun yığmada oynamaq ehtimalı olub? Sualımıza millinin skautu İlqar Qurbanov belə cavab verdi:

"Ruslanla 2 il öncə tanış olmuşduq. O, hələ premyer-liqada debüt etməmişdi. Birinci divizionda, "Veles"də oynayırdı. Həmin vaxt onu tapmışdım. 21 yaşadək futbolçulardan ibarət yığmaya cəlb etmək istəyirdik. Amma alınmırdı. Bəzi səbəblər var idi. Burda gizlətməli heç nə yoxdu, problem pasportunda idi. Azərbaycanla əlaqəsi olan hər bir Rusiya vətəndaşı bu problemlə üzləşir. Bizim yığmada çıxış edən kimi legioner sayılırlar. Bir çoxları buna görə it-bat olur. Nə vaxt bu problem həll olunsa, legioner sayılmasalar, daha rahat şəkildə yığmamızı seçərlər. Amma indi bu məsələ çox çətindi. Heç kim orda oynayıb, bura gəlmək istəmir. Çünki legioner sayılacaqlar".

İlqar Qurbanov Fişenkonun səsləndirdiyi fikirlərə də cavab verdi:

"Müsahibəsi ilə tanış deyiləm. Maraqlı da deyil. Onun jurnalistlərə dedikləri yox, üzbəüz danışdıqları maraqlıdı. Mənimlə görüşlərdə dəfələrlə deyib ki, yığmada oynamaq istəyir. İndi bunu arzulamırsa, öz seçimidi. Bizim millidə oynamaq istəməyəni məcbur etmirik. Azərbaycan yığmasında cani-qəlbdən çıxış etmək istəyənləri seçirik. Burdan hamısı eşitsin. Ürəyi bizimlə döyünməyən heç kimi millidə görmək istəməyəcəyik".

İLKİN SULTANLI