İlqar Qurbanov: “Yaxın zamanda onunla görüşüləcək və danışıqlar aparılacaq” - AÇIQLAMA
"Ximki"nin yarımmüdafiəçisi Ayaz Quliyev millimizdə çıxış etmək ehtimalından danışıb.
"Sport24.ru"ya müsahibə verən 25 yaşlı futbolçu AFFA-nın konkret addım atmadığını dilə gətirib:
"Federasiya ilə daimi əlaqə saxlayıram, amma heç vaxt yekun təklif irəli sürməyiblər. Hər şey səthidi, konkret söhbət olmadan baş verir. Mənim üçün bir yerdə oturmaq, danışmaq, bir-birimizi dinləmək və ortaq nöqtəyə gəlmək lazımdı. Belə çıxır ki, məni istəyirlər, amma heç nə olmur. Konkret danışıqlardan sonra Azərbaycan millisində oynamaq istəyib-istəmədiyimi biləcəm. İndi isə nəsə söyləmək olmur. Tələsik qərar vermək istəmirəm".
Görəsən, qarşıdakı oyunlarda futbolçu yığmamızda çıxış edə bilər. AFFA “Ximki”nin üzvü ilə danışıqlara başlayacaq? Bunu aydınlaşdırmaq üçün qurumun Mətbuat və İctimaiyyətlə Əlaqələr Şöbəsinin rəhbəri Firuz Abdulla ilə əlaqə saxladıq. Həmsözhbətimiz Quliyevin yığmaya namizəd futbolçular arasında olduğunu dedi:
“Ayaz Quliyev milli komandaya namizəd kimi mütəmadi diqqət mərkəzində saxlanılan oyunçulardan biridi. Lakin bu məsələ ilə bağlı konkret qərar yoxdu. Futbolçu milli komandaya dəvət olunacağı təqdirdə, ictimaiyyətə müvafiq məlumat veriləcək”.
Görəsən, futbolçu ilə danışıqları kim aparır? AFFA rəsmiləri nə üçün Ayazla təmasa keçmir? Ümumiyyətlə, yarımmüdafiəçinin tələbi nədi? Suallarımızı millinin meneceri İlqar Qurbanova ünvanladıq:
“Səhv etmirəmsə, Ayaq Quliyevlə mən bu işə başlamamış danışıq gedirdi. Amma bilmirdim ki, bu məsələyə kim nəzarət edir. Futbolçu siyahımızdadı, onu izləyirik. Yaxın gələcəkdə onunla bağlı konkret nəsə olsa, mətbuata açıqlama veriləcək. Hələ ki dəqiq bir şey yoxdu. Lakin deyə bilərəm ki, yaxın zamanda onunla görüşüləcək və danışıqlar aparılacaq”.
Hazırda Rusiya ilə Ukrayna arasında müharibə davam edir. FIFA və UEFA şimal qonşularımızı bütün turnirlərdən uzaqlaşdırıb. Görəsən, bu amil Rusiyada yaşayan və çıxış edən azərbaycanlıların millimizdə çıxış etməsinə təsir edə bilər? İlqar Qurbanov məsələyə belə aydınlıq gətirdi:
“Müharibənin futbolumuza xeyrinin və ya ziyanının olduğunu bilmirəm. Rusiya premyer-liqasında çıxış edərək gəlib bizim millidə oynamaq bir az çətindi. Mən onları çox yaxşı başa düşürəm. Danışıqlar alınmayanda onlara etirazım olmur. Çünki belə olan halda Rusiya premyer-liqasında əcnəbi sayılırlar. Bu da onların əsas heyətdə yerini itirməsinə səbəb ola bilər. Amma ümumilikdə mən hamısını izləyirəm, əlaqə saxlayıram. Baş məşqçimiz hansısa futbolçuya maraq göstərirsə, onunla daha yaxından təmas qururuq. Bir çoxları ilə danışıqlar gedir. Lazım olanları da yığmaya dəvət etmişik. Məsələn, Rüstəm Əhmədzadə, Anatoli Nuriyev, Emil Mustafayev kimi oyunçular millilərimizdə çıxış edir. Kim yığmada oynamaq istəyirsə, ona qapımız həmişə açıqdı. Amma belə bir şey var ki, kim millidə oynamağa layiqdisə, onu da baş məşqçi dəvət edir”.
İLKİN SULTANLI
Digər xəbərlər
