"Hər futbolçu millidə oynamaq istəyir. Odu ki, Kadinin Polşa millində çıxış etmək arzusu normaldı. Amma başqa ölkənin vətəndaşı olan futbolçu digər dövlətin yığmasında FİFA-nın müəyyənləşdirdiyi müvafiq qaydaları gözləməklə çıxış edə bilər. Kadi bu istəyini həyata keçirmək üçün minimum 5 il Polşada yaşamalıdı. Braziliyalı isə Polşada heç vaxt yaşamayıb. Məntiqlə onun Azərbaycan millisində oynamaq şansı daha yüksəkdi. Çünki artıq ilyarımdı ölkəmizdə çıxış edir".

"Bir futbolçunun 5 ildən daha tez müddətdə millidə oynamasına o halda icazə verilir ki, özü və yaxın qohumlarının təmsil edəcəyi ölkəyə bağlılığı var. Yəni ya futbolçunun özü, ya valideynləri, ya da nənə-babası həmin ölkədə doğulmalıdı. Məsələn, bizdə deyək ki, Aleksey İsayevi “milliləşdirərək” 5 il gözləmədən yığmaya cəlb etmək ona görə alındı ki, futbolçu Azərbaycan kökənlidi, nənə-babası burda doğulub. Eynilə milli pasport alan başqa futbolçularımız haqda da bunu demək mümkündü. Amma Kadinin nə özü, nə valideynləri, nə də nənə-babası Polşa doğumludu. Ulu babası Polşa əsillidi, o da həmin ölkədə yaşamayıb. Kadinin pasportunda milliyyəti braziliyalı göstərilib. Yəni Polşa kökənli olmasına rəğmən, 5 il Polşada yaşamasa, bu ölkənin əsas komandasında çıxış edə bilməz. Kadinin millimizdə oynayıb-oynamamaq istəyinə gəlincə, bunu zaman göstərəcək. Hələ qarşıda 3,5 il vaxt var. Yalnız bu müddət keçəndən sonra braziliyalı özü millimizdə oynamaq istəyini bildirə, ya da AFFA belə təşəbbüslə çıxış edə bilər. İstənilən halda, indidən bu haqda danışmaq çox tezdi".