Samir Abasov: “Yeni transferlər sona qədər ritmi saxlaya bilmədi”
Misli premyer-liqasında 20-ci tura start verilib.
“Sumqayıt” “Turan Tovuz”u qəbul edib - 2:1. Oyundan sonra meydan sahiblərinin çalışdırıcısı Samir Abasovun mətbuat konfransı keçirilib. Sizi mütəxəssisin fikirləri ilə tanış edirik:
“Yaxşı oyun alındı. Komanda şəklində nə etdiyimizi bilirdik. Məşqdə çalışdıqlarımızı meydanda göstərə bildik. Oyunun sonlarını çıxmaqla hər şey yaxşı alındı. Son dəqiqələrdə güclü təzyiqə məruz qaldıq. Yeni transferlər sona qədər ritmi saxlaya bilmədi və bu, oyunumuza təsir etdi”.
- İkinci hissədə təhlükəli əks-hücumlarınız olsa da, son nöqtəni qoya bilmədiz. Bu, nə ilə bağlıdı?
- Düzdür, epizodlar qol olsaydı, daha rahat olardıq. Sonluğun gəlməməsinin cavabı yoxdu. Bunu şanssızlığa bağlayıram.
- Qazon sanki çox sulanmışdı, futbolçular çox sürüşürdü...
- Bizim stadionlarda belə problemlər var. Məsələ otdadı. Bu sualın cavabını verə bilmirəm. Su vuruldu-vurulmadı, ot ayağın altından qaçır. Bu, bizim üçün həddindən artıq əziyyətlidi.
- Son dəqiqələrdə gənclərə şans verməyiniz riskli addım deyildi?
- Məcburi dəyişikliklər oldu. Hər riskli vəziyyətdə Nihat və onun kimiləri buraxsaq, yaxşı olar.
- Qadzenin yeri görünmədi?
- Xeyr. Qadze sürətli hücumlar zamanı axsayırdı. Toplanışa gəlmədi və onu klubdan göndərdik.
- Ehtiyat oyunçular skamyasının zəifliyini necə şərh edərdiz?
- 2-3 mərkəz müdafiəçimiz var, onlardan 2-si zədəlidi. Nə deyə bilərəm? Ehtiyat oyunçularımızın azlığı zədələrlə bağlıdı. Bu, azı 2-3 həftə çəkəcək.
- Kərim Abubakar ilk oyununda pis təsir bağışlamadı. Hücumda ona güvənəcəksiz və Kamran Əliyevlə bağlı vəziyyət nə yerdədi?
- Abubakar hələ ilk oyununa çıxdı. Bu gün çox çalışdı. Kamranla bağlı yaxın zamanda açıqlama olacaq. Məşqlərdə xoş təəssürat bağışlayır.
Digər xəbərlər
