Xüsusi bileti 2,6 milyon dollara aldı

Çoxdan gözlənilən oyun bu gün təşkil ediləcək. Bu gün Ər-Riyad şəhərində PSJ ilə Səudiyyə Ərəbistanının “Əl-Hilal” və “Əl-Nəssr” klublarının ulduzlarından ibarət birgə komanda arasında yoldaşlıq matçı keçiriləcək.

Bu oyun daha çox PSJ-nin argentinalı hücumçusu Lionel Messi ilə “Əl-Nəssr”in yeni transferi Kriştiano Ronaldonun növbəti qarşılaşması kimi diqqəti cəlb edir. “Ekip” nəşrinin məlumatına görə, bügünkü matç PSJ-ni 10 milyon avrodan çox irəli salacaq. Fransa klubu bu məbləği 2022/23 mövsümünün büdcəsinə daxil edib. Bu isə rəhbərliyin PSJ-nin maliyyə göstəricilərini yaxşılaşdırmaq istəyi ilə bağlıdı. Xatırladaq ki, paytaxt təmsilçisi 2021/22 mövsümünü 369 milyon avro itki ilə başa vurub.

Yeri gəlmişkən, Səudiyyə Ərəbistanından olan milyarder Muşref Əl-Qamdi hərracda yoldaşlıq matçı üçün hazırlanan xüsusi biletə sahib çıxıb. Daşınmaz əmlak maqnatı kimi tanınan biznesmen bileti 2,6 milyon dollara alıb. Əl-Qamdi bu qədər xərcə düşməklə komandaların paltardəyişmə otağına daxil olmaq və futbolçularla şəkil çəkdirmək hüququ qazanıb. Qeyd edək ki, hərracın gedişində xüsusi biletin ilkin qiyməti 10 dəfə artıb.