Bilindiyi kimi Kriştiano Ronaldo bu mövsüm Çempionlar Liqasında iştirak etmir.

Football-plus.az xəbər verir ki, bu üzdən onun ən prinsipial rəqibi Lionel Messi bəzi göstəricilərdə portuqaliyalı superulduza yaxınlaşa bilər. Bir göstəricidə Messi artıq indidən Kriştianonu geridə qoymağı bacarıb. Dünən Çempionlar Liqasının qrup mərhələsinin 2-ci turunda PSJ səfərdə Hayfa ''Makkabi''sini 3:1 hesabı ilə məğlub edib. Argentinalı superulduz komandasının 1-ci qolunu vurub. Bununla da Messi bu turnirdə 39-cu fərqli klubun qapısına yol tapmaqla Ronaldonu (38) geridə qoyub.

Bu göstəricidə digər pillələrdə Kərim Benzema (34), Raul Qonsales (33) və Robert Levandovski (31) qərarlaşıb. Bundan başqa Messi ÇL tarixində ardıcıl 18 mövsüm qol vuran ilk futbolçuya çevrilib. Amma Ronaldo ÇL-də qol (140), məhsuldar ötürmə (42) və oyun (187) sayı kimi göstəricilərdə hələ də liderdi. Maraq üçün Messinin 126 qol vurduğunu, 37 məhsuldar ötürmə verdiyini və və 158 oyun keçirdiyini bildirək.