Kriştiano Ronaldodan sonra Lionel Messi də Səudiyyə Ərəbistanında oynaya bilər. “Əl-Hilal” rəhbərliyi PSJ-nin hücumçusu ilə müqavilə bağlamaq istəyir.

İspaniyada çıxan “Mundo Deportivo” qəzetinin xəbərinə görə, klub hücumçuya ildə 280 milyon (!) avro ödməyə hazırdı. Messinin PSJ ilə müqaviləsinin müddəti cari mövsümün sonuna qədərdi. Fransa klubu sözləşmənin yenilənməsi üçün uzun müddətdi onunla danışıqlar aparır. Argentinalı dünya çempionu “Əl-Hilal”a keçməyə razı olsa, onun müqaviləsindəki şərtlərin böyük hissəsi dövlət tərəfindən maliyyələşdiriləcək. Səudiyyə Ərəbistanının futbol ictimaiyyətinin rəyinə əsasən, Ronaldonun “Əl-Nəssr”ə keçidindən sonra Messinin “Əl-Hilal”a transferi yerli liqaya marağı artıracaq. Bu isə ölkənin 2030-cu ilə təyin olunan dünya çempionatına evsahibliyi etmək şansını artıracaq. Maraq üçün qeyd edək ki, “Əl-Hilal” - “Əl-Nəssr” oyunu Səudiyyə Ərəbistanının əsas derbisidi. Onu da əlavə edək ki, Səudiyyə Ərəbistanının turizm səfiri olan Messi 2022-ci ilin mayında bu ölkəyə səfər edib.

İngiltərədə çıxan “Daily Mail” qəzeti Lionelin atası Xorxenin hazırda Ər-Riyadda olduğunu və yerli klubla danışıq apardığını xəbər verib. Yeri gəlmişkən, “Əl-Hilal”ın baş direktoru Fahed Əl-Mofaric Lionellə müqavilə imzalayacaqları ilə bağlı yayılan xəbəri təkzib etməyib: “Bu, Kriştiano Ronaldonun müqaviləsinə bənzəyir. Söhbət təkcə klubdan və oyunçudan getmir. İdman nazirinin açıqlamasından sonra Səudiyyə Ərəbistanının bütün klubları böyük bir irəliləyişə hazırlaşır”.