''Qalatasaray'' bu mövsüm nəticələr baxımından uğurlu çıxış etsə də, komandanın təzminatlardan heç cür başı açılmır.

Sabiq oyunçular – Rayan Babel, Sofian Fequli və Erik Pulqar klubdan FİFA-ya şikayət edib. Lukas Torreyranın birinci klubu ''Peskara''ya görə isə FİFA ''Cim-Bom''a transfer qadağası qoysa da, pul ödənildikdən sonra cəza götürüldü. İndi də Domenek Torrentin məsələsi ortaya çıxdı. Bilindiyi kimi kataloniyalı mütəxəssis ötən yay klubla hələ birillik müqaviləsi olmasına rəğmən 4 köməkçisi ilə birlikdə istefaya göndərilmişdi. Onların hamısı İstanbul nəhəngindən FİFA-ya şikayət etmişdi. FİFA onların haqlı olduğuna və ''Qalatasaray''ın ümumilikdə 2 milyon 634 min avro təzminat ödəməli olduğuna qərar verib! Amma ''sarı-qırmızılar'' belə asanlıqla təslim olmaq istəmirlər. Komanda məsələni İdman Arbitraj Məhkəməsinə (CAS) daşıyıb. Loru dildə desək, birinci raundu Torrent və köməkçiləri qazandı. İndi isə ikinci raund başlayır.

Xatırladaq ki, ''Qalatasaray'' ötən mövsümün gedişində Fatih Terimlə yollarını ayırdıqdan sonra 2022-ci ilin yanvarın 14-də Torrentlə ilyarımlıq müqavilə imzalamışdı. Amma məşqçi karyerasında Xosep Qvardiolanın köməkçisi işləməkdən başqa heç bir uğuru 61 yaşlı bu mütəxəssisin 5 ay 7 gün davam edən dönəmi klub tarixinin ən qara günlərindən biri kimi yadda qaldı. Torrent 12-ci pillədə təhvil aldığı komandanı 13-cü pillədə təhvil verdi. Ümumilikdə ''Qalatasaray'' onun rəhbərliyi altında keçirdiyi 20 rəsmi oyundan 7 qələbə, 5 heç-heçə, 8 məğlubiyyətlə ayrıldı. Təzminat istəmək və pulunu sona qədər almaq təbii ki, Torrentin haqqıdı. Amma işini mənəvi tərəfinə baxsaq, bu cür nəticələrdən sonra təzminat tələb etmək üçün də adamda gərək üz olsun…