Derbidə ''Beşiktaş''ı Mauro İkardinin qolları ilə məğlub edən ''Qalatasaray''la bağlı Türkiyə mətbuatında diqqətçəkən xəbər yayılıb.

Maaşlar vaxtında ödənilmədiyi üçün futbolçuların menecerlərinin rəhbərliyə sonuncu dəfə xəbərdarlıq etdiyi məlum olub. Söhbət hazırda heyətdə olan Patrik van Anholt ilə Lukas Torreyra, eləcə də ötən mövsümün ikinci dövrəsini icarə əsasında ''Cim-Bom''da keçirən Erik Pulqardan gedir. Pulqar hələ də ötən mövsümdən qalan pulunu ala bilməyib. Van Anholtla Torreyra isə son ayların maaşının gecikməsindən narazıdı. Uruqvaylı Torreyra maaşdan əlavə rəhbərlikdən imic haqqına görə gecikən pulu faizlərlə birlikdə tələb edir. Hər üç oyunçunun meneceri sonuncu xəbərdarlığın ardından FİFA-ya şikayət etmək niyyətindədi. Maraqlıdı ki, maddi problemlərə baxmayaraq ''Beşiktaş'' üzərində qələbəyə görə rəhbərlik söz verdiyi pul mükafatını artıq ödəyib. Hər oyunçunun hesabına 250 min lirə (təxminən 22850 manat) köçürülüb.

Qeyd edək ki, son 1 ayda ''Qalatasaray''ın iki sabiq üzvü – Sofian Fequli ilə Rayan Babel ''Qalatasaray''ın onlara borcunun olduqlarını bildirərək klubdan FİFA-ya şikayət ediblər. Fequli 1,6, Babel isə 1,3 milyon avro tələb edir.