''Qalatasaray''dan pulunu tələb edərək klubdan şikayət edənlərin sırasına daha bir nəfər qoşulub.

Ötən mövsüm bitdikdən sonra Sofian Fequli ilə Rayan Babel, bu mövsümün gedişində isə Lukas Torreyra, Patrik van Anholt kimi oyunçular FİFA-ya şikayət etmişdi. İndi də İqor Tudorun ''Qalatasaray''a gəlişində rol oynamış menecer Federiko Pastorello 5 ildən sonra İstanbul nəhəngindən pulunu tələb etmək qərarına gəlib. O, klubun ona 180 min avro borcunun olduğunu bildirərək İstanbul Əsliyə Hüquq Məhkəməsinə şikayət edib.

Pastorellonun iddiasına görə 2017-ci ilin fevralın 15-də Tudor ''Qalatasaray''la ilyarımlıq müqavilə imzalayarkən, ''sarı-qırmızılar'' menecerlik haqqı kimi ona 180 min avro ödəməyə razı olmuşdular. Bir müddət sonra Pastorello ''Qalatasaray''dan pulun müəyyən hissəsini, konkret desək 60 min avro tələb etsə də, qarşı tərəfdən ona heç bir cavab verilmədi.

Xatırladaq ki, Tudor ''Aslan''da cəmi 10 ay işləmiş və 2017-nin dekabrında qovulmuşdu. Onun əvəzinə baş məşqçi postuna gələn Fatih Terim həmin mövsüm komandanı çempion etmişdi.