Domenek Torrent ''Qalatasaray''da qazandığı pulların hesabına İstanbulda gözəl həyatın dadını çıxarmaqda davam edir.

Bilindiyi kimi İstanbul nəhəngi Fatih Terimin gözlənilməz şəkildə istefaya göndərilməsinin ardından bu ilin yanvarında Torrenti baş məşqçi postuna gətirmiş və onunla ilyarımlıq müqavilə imzalanmışdı. Karyerasında Xosep Qvardiolanın köməkçisi olmaqdan başqa heç bir uğuru olmayan Torrentin ''Cim-Bom''u bataqlıqdan çıxara bilməməsi sürpriz olmadı. Rəhbərlik dəyişdikdən sonra Torrent ilə yollar ayrıldı. 60 yaşlı ispaniyalı mütəxəssis cəmi 6 ay ərzində 1,2 milyon avro qazanaraq ''Qalatasaray''ın sayəsində bir andaca həyatına rəng qatdı. Torrent bununla kifayətlənməyərək müqaviləsinin birtərəfli şəkildə pozulmasına görə İstanbul nəhəngindən FİFA-ya şikayət edib. Bu məsələdə də haqlı görünən mütəxəssisin əlavə 2 milyon avro da qazanacağı gözlənilir!

İspaniyalı çalışdırıcı hələ də Türkiyədən ayrılmayıb. Qazandığı pullar sayəsində yayın böyük hissəsini Çeşmə və Alaçatıda istirahət ədən Torrent İstanbuldakı evində yaşamaqda davam edir. Onun bol-bol alış-veriş etməsi də diqqətdən qaçmır. Qısası, hazırda karyerası ilə bağlı heç bir planı olmayan Torrent ''Qalatasaray''dan aldığı pullar sayəsində lüks həyat yaşamaqda davam edir. Bəzi mənbələr iddia edir ki, heç bir təklif almayan və heç kimə lazım olmayan Torrent bundan sonra ümumiyyətlə məşqçilik etmək istəmir.