Karyerasını “Qalatasaray”da davam etdirən Lukas Torreyra ilə bağlı Türkiyə mətbuatında maraqlı bir xəbər yayılıb.

Bilindiyi kimi, bir neçə gün öncə “Qalatasaray”ın bəzi futbolçularının menecerləri kluba hədə-qorxu gəlmişdi. Çünki futbolçuların maaşları vaxtında ödənilmir. Söhbət hazırda heyətdə olan Patrik van Anholtla Torreyranın, eləcə də ötən mövsümün ikinci dövrəsində “Cim-Bom”da icarə əsasında top qovmuş Erik Pulqarın menecerindən gedir. Bu arada məlum olub ki, Torreyranın meneceri işi bir qədər də irəli daşıyaraq birdəfəlik FİFA-ya şikayət edib! O, “Qalatasaray”dan Torreyranın hələ də ödənilməyən imic haqqını faizləri ilə birlikdə tələb edir. Sən demə, menecer bunu Torreyradan xəbərsiz edib. Ona görə də 26 yaşlı yarımmüdafiəçi həmin menecerlə yollarını ayırıb! Bu xəbəri “Hürriyət” nəşri yayıb. Torreyra məsələ ilə bağlı rəsmi açıqlama verməyib.

Xatırladaq ki, bu futbolçu cari mövsümün əvvəlində 6 milyon avro qarşılığında “Arsenal”dan transfer olunub. İndiyə qədər superliqada 11 qarşılaşmada meydana çıxan Torreyranın hesabında qol və məhsuldar ötürmə yoxdu. Torreyra Türkiyə çempionatında top qovan uruqvaylılar arasında qarşıdakı mundial üçün yığmanın heyətinə adı salınan 3 oyunçudan biridi. Digəri onun “Qalatasaray”dakı komanda yoldaşı Fernando Muslera, eləcə də “Trabzonspor”lu Maksi Qomesdi. “Fənərbaxça”nın uruqvaylısı Dieqo Rossinin adı isə yekun siyahıya salınmayıb. Torreyra indiyə qədər yiğmada 40 qarşılaşmada işitirak edib və 2 məhsuldar ötürmə ilə fərqlənib. Sonda onu da bildirək ki, “Qalatasaray”dan gecikmiş pullarını tələb edərək FİFA-ya şikayət edənlər arasında Sofian Fequli ilə Rayan Babel də var. Hər iki oyunçu bu yay komandanı tərk edib. Fequli 1,6 milyon, Babel isə 1,3 milyon avro tələb edir.