"Bu məsələni mətbuatdan daim izləyirəm. Onu qeyd edim ki, klub daxilində başverənlərin ictimailəşdirməsinin tərəfdarı deyiləm. Məsələ bu yerə qədər gəlib çıxmamalıydı. Rauf Əliyev, Əfran İsmayılov və Elvin Yunuszadəni komandaya Yaşar Vahabzadə cəlb etmişdi. Onun istefasından sonra Tərlan Əhmədov "Kəpəz"in “sükanı arxasına” keçdi. Tərlan müəllim futbola fərqli fəlsəfəylə yanaşan mütəxəssisdi. Vaxtilə onunla həm klublarda, həm də millidə birgə çıxış etmişik. Bir-birimizin xətir-hörmətini saxlayırıq. Gənc olarkən bizə qarşı da haqsızlıqlar olub. Amma sakit, mədəni şəkildə həll etmişik. Düşünürəm ki, təcrübəli futbolçuya qarşı sıradan biri kimi davranmaq, müraciət etmək düz deyil. Onlar çox həssas olur. Baş məşqçi, rəhbərlik hər bir futbolçu, o cümlədən təcrübəli oyunçular ilə son dərəcə mədəni, təmkinli, sakit tərzdə oturub söhbət etməli və xoşluqla yolları ayırmalıdı. Mətbuatda yazılanlara əsasən danışsaq, Tərlan müəllim bir az Raufa sərt müraciət edib. Futbolçu da bundan xoşlanmayıb və məsələ böyüyüb. Raufu yaxından tanıyan və oyunlarını izləyən biri kimi deyim ki, o bir az aqressiv futbolçudu. Buna rəğmən, bütün gücünü, canını qoyan oyunçudu. Görünür, Rauf və başqa futbolçular prinsipə düşüblər və komandadan getməyəcəklərini bildiriblər. Yaxşı olardı ki, başqa kluba keçib oynayaydılar. Amma bu olmadığı halda - futbolçunun müqaviləsinin müddəti mövsümün sonuna kimidisə, təzminat tələb edirsə, onu da vermirlərsə, öz xoşu ilə getmirsə - heç kim onu komandadan yola sala bilməz. Ən yaxşı halda gedib əvəzedicilərdə oynayıb formalarını saxlayacaqlar, ya da oynamayıb maaşlarını alacaqlar. Yaxşı olardı ki, heç yerə getməyəcəklərsə, əvəzedicilərdə çıxış edib formada qalsınlar və gələcəkdə başqa kluba keçsinlər. Amma kaş ki, belə hallar olmayaydı".

"İstənilən halda, tərəflərin atdığı imzalara hörmət etmələri vacibdi. Məsələn, kluba məxsus hansısa futbolçuya başqa bir komandadan təklif gəlirsə və onu buraxmırlarsa, “elçi düşən” tərəfdən müqavilədə göstərilən təzminatın ödənilməsi istənilir. Bu hal baş vermədikdə oyunçu müqaviləyə əsasən komandada qalır. "Kəpəz"də isə fərqli durumdu. Baş məşqçiyə təcrübəli futbolçular lazım deyil, amma klubla mövsümün sonuna kimi müqavilələri var. Narazı futbolçulara da müqavilənin şərtləri sərf edir deyə, komandanı tərk etmək istəmirlər. Onlar hüquqi baxımdan da haqlıdılar. Bəlkə də onlara başqa klublardan daha yaxşı və ya "Kəpəz"dəki şərtlərlə təkliflər gəlsə, çoxdan getmişdilər. Bu da olmadığından hazırkı müqaviləni rəhbər tutaraq heç yerə getmirlər. Belə olan halda məsələnin yeganə həlli təmkinlə danışıqlar aparılması və ədalətli güzəştə gəlinməsidi. Dəqiq deyə bilmərəm narazı futbolçuların müqavilə şərtləri necədi, komandadan vaxtından əvvəl yola salınırsa, nə qədər təzminat veriməlidi? Amma sözləşmədə konkret məbləğ nəzərdə tutulmayıbsa və futbolçu vaxtından əvvəl yola salınırsa, onun bütün maaşını tələb etmək və ya klubu tərk etməmək haqqı var. Eynilə klubun da təzminatı ödəyərək futbolçunu yola salmaq və ya ödəməyərək onu komandada saxlamaq seçimi var".

"Müqavilədə futbolçunun vaxtından əvvəl yola salınmasına görə təzminat ödənilməsi göstərilibsə, həmin məbləğ verilmədən heç kim klubdan ayrılmaz. Baş məşqçi futbolçuları komandada görmək istəmirsə, oturub danışmaq lazımdı. İndiki halda onların bütün təzminatları ödənilməklə yola salınmalıdı".