Tərlan Əhmədov "Kəpəz"in “sükanı arxasına” keçər-keçməz futbolçulara statusunu göstərməyə imkan tapıb.

Təcrübəli mütəxəssisin ilk məşqdə Rauf Əliyevi meydandan qovmasından xəbəriniz var. Tərlan bəy niyə belə addım atıb, təcrübəli futbolçu niyə qəzəbə tuş gəlib?

Yaşananlarla bağlı etibarlı mənbədən “Football-plus.az” saytına məlumat daxil olub. Sən demə, komandanın məşqi zamanı futbolçular tapşırıqları yerinə yetirərkən Abdullahi Şuaybu bəzi səhvlərə yol verib. Bu isə Rauf Əliyevin xoşuna gəlməyib və o, nigeriyalı yarımmüdafiəçiyə yüksək tonla, sərt şəkildə etirazını bildirib. Bunu görən Tərlan Əhmədov isə forvarda əsəbləşib və baş məşqçi olan yerdə onun kiməsə yerli-yersiz irad bildirməsinin düzgün olmadığını söyləyib. Həmin an Rauf baş məşqçiyə də qarşılıq verib.

“Səbail”lə oyunda meydandan qovulan və 5 oyun cəzalanan hücumçunun bu hərəkəti Tərlan bəyi daha da özündən çıxarıb və onu məşqdən qovub. Bütün bunlar “Kəpəz”in səhər məşqində yaşanıb. Günün ikinci yarısında keçirilən məşqdə isə artıq Rauf olmayıb. Mənbəmizin sözlərinə inansaq, 33 yaşlı futbolçu acıq edərək Gəncədən ayrılıb və Bakıya üz tutub.

RƏŞAD