Qış fasiləsi ərəfəsində Mahmud Qurbanovun “Səbail”dən ayrılması bir qədər gözlənilməz oldu.

Düzdü, “dənizçilər” 49 yaşlı mütəxəssisin rəhbərliyi altında premyer-liqada sonuncu pillədə idi. Ancaq “Səbail”in ölkə kubokunun yarımfinalına yüksəlməsi, bu yolda “Sabah” kimi ciddi rəqibi mübarizədən kənarlaşdırması baş məşqçi və məşqçilər korpusu adına uğur kimi dəyərləndirilməlidi.
Əslində istefa ilə bağlı Mahmud bəylə danışmaq istəyirdik. Təəssüf ki, “dənizçilər”in sabiq baş məşqçisi neçə gündü zənglərə cavab vermir. Bu üzdən komandada onun köməkçisi funksiyasını yerinə yetirən Zaur Ramazanovla əlaqə saxladıq. Zaur bəylə söhbətdə bizi maraqlandıran bəzi suallara cavab tapmağa çalışdıq.

- Komandadan ayrılacağınızı gözləyirdiz?
- Açığı, yox. Çoxları deyir ki, “Səbail” sonuncu pillədədi. Bu səbəbdən baş məşqçi ilə vidalaşmaqda qeyri-adi heç nə yoxdu. Bəli, “Səbail” qış fasiləsinə 10-cu yerdə yollandı. Ancaq onu da nəzərə almaq lazımdı ki, 7-ci pillədə olan “Turan Tovuz”la bizi cəmi 7 xal ayırır. 3 xallıq sistemdə elə də böyük fərq deyil. Fasilədə komandanı bir qədər də gücləndirib yolumuza davam edəcəkdik. Komanda kubokun yarımfinalına vəsiqə qazanmışdı. Heç kim gözləmirdi ki, “Səbail” “Sabah” kimi komandanı hər iki oyunda məğlub edib, yarımfinala yüksəlsin. Bunlar hamısı çəkilən əziyyətin bəhrəsi idi. Yenə deyirəm, komandadan ayrılmağımız mənim üçün gözlənilməz oldu. Mahmud müəllim zəng etdi ki, belə bir məsələ var. Biz onunla bir yerdə gəldiyimizdən onunla da ordan getdik.

- Çoxları üçün hələ də qaranlıq qalıb. Mahmud bəy özü istefa verdi, yoxsa göndərildi? Göndərilibsə, ortada təzminat məsələsi də olmalıdı...
- Rəhbəliklə görüşdə mən iştirak etməmişəm. Onlarla baş məşqçi danışıb. Ancaq onu deyə bilərəm ki, Mahmud müəllim özü istefa verib. Görüşün dettalları barədə məlumatım yoxdu.

- Futbol camiəsində gəzən söz-söhbətə inansaq, yaydakı transfer siyasətinin uğursuz olmasını rəhbərlik heç də birmənalı qarşılamayıb. Və məhz bu səbəbdən rəsmilərlə baş məşqçi arasında fikir ayrılığı olub.
- Bir nüansı unutmaq lazım deyil. Futbolda normal komanda formalaşdırmaq üçün 2-3 il lazımdı. Biz də klubla ikiillik müqavilə bağlamışdıq. Məhz bu məqamı nəzərə alıb addım atmışdıq. 5-6 aya yeni komanda yaratmaq olar?

- Məgər “Səbail yeni komandadı? Yeni o komandaya deyilir ki, işə sıfırdan başlayasan.
- Mövsümün əvvəlində kollektivin 70 faizi dəyişdi. Legionerlərlə yanaşı, yeni yerli futbolçular dəvət olundu. Ağabala Ramazanov, Emil Balayev kimi futbolçulara yeni kollektivə uyğunlaşmaq üçün müəyyən vaxt lazım idi. Legionerlərə də həmçinin. Transfer siyasətinin uğursuz olmasına gəlincə, bu komanda yarımfinala adlayıb. Bu uğursuzluqdu? Yenə təkrarlamaq məcburiyyətindəyəm: ilk “beşlik”lə aramızdakı xal fərqinə baxın. Onu da nəzərə almaq lazımdı ki, hər legioner ilk gəldiyi vaxt adından söz etdirə bilmir. Bu bir az bəxtlə bağlı məsələdi. Fikrimcə, “Qarabağ”ın əcnəbilərini nəzərə almasaq, bu yay Azərbaycana gələn legionerlər arasında Abdullahi Şuaybu parlaq oyunla yadda qaldı. O da bir il idi futbol oynamırdı. Ancaq “Kəpəz”də özünü yaxşı tərəfdən göstərə bildi. Kim gözləyərdi ki, nigeriyalı komandasının lideri olacaq? Legioner var ki, bir çempionatda parlaq oyun sərgiləyir, ölkəni dəyişəndə ilk vaxtlar bir qədər kölgəyə çəkilir. “Zirə”yə diqqət edin. Görün heyətə nə qədər əcnəbi futbolçu dəvət edib. Ancaq komanda istənilən səviyyədə çıxış etmir. “Sumqayıt”ın da legionerləri ümidləri doğrultmadı.

- Mövsümün əvvəlində, demək olar, hamı “Səbail”in büdcəsinin yetərincə artdığına görə avrokuboklara iddialı olacağını deyirdi. Ancaq ilk yarıdan sonra komanda sonuncu pillədə qərarlaşmaqla ehtimalları alt-üst etdi...
- Büdcənin nə qədər olduğunu deyə bilmərəm. Belə məsələlərlə heç vaxt maraqlanmamışam. Ancaq onu qeyd edim ki, rəhbərlik komandanın uğur qazanması üçün hər şey edirdi. Maaş və mükafatlar vaxtında verilir, futbolçuların rahatlığı üçün hər şey edilirdi. Bu yöndə heç bir çətinliyimiz olmayıb. Avrokuboklar? Şansımız hələ də qalırdı. Ölkə kubokunu qazanacağımız halda qitəmiqyaslı turnirə yollana bilərdik.

- Kuboku qazanacağnıza əmin idiz? İlk növbədə yarımfinalda “Qəbələ”ni dayandırmalıydız. Bunu bacaracağınız halda final matçını qazanmalıydız...
- Futbolda heç nəyi əvvəlcədən əminliklə demək olmur. Ancaq “Qəbələ”ni keçmək olardı. “Sabah”ı mübarizədən kənarlaşdırmağı bacarmışdıqsa, “Qəbələ”yə də eyni aqibəti yaşada bilərdik. Final isə bir oyundan ibarətdi. Hər şey mümkün idi.

- Sizcə, harda səhvə yol verdiz?
- Məncə, bir qədər təcrübəsizlik etdik. Mahmud müəllim də cari mövsümə qədər bu sayda legionerlə işləməmişdi. Qısamüddətli “Kəpəz” dönəmini nəzərə almasaq, premyer-liqada iş təcrübəsi o qədər də böyük deyildi. Buna baxmayaraq, Qurbanov kimi mütəxəssislə çiyin-çiyinə işlədiyimə görə fəxr edirəm. Mahmud müəllim futbol oynadığı illərdə təsadüfi yerə “professor” adını qazanmamışdı. Onun futbola baxışı, savadı çox yüksəkdi. Gələcəkdə də onun yanında olmaq istərdim.

- Necə düşünürsüz, komanda Şahin Diniyevin rəhbərliyi altında uğur qazana biləcək?
- Qazana da bilər, qazanmaya da. Bunu zaman göstərəcək. Nəticə qazansa, lap yaxşı. Uğur olmasa belə, onu çox sıxmayacaqlar. Deyə bilər ki, bu komandanı mən yığmamışam, qış fasiləsində gəlmişəm. Bu sözlərdən sonra ona kim nə deyə bilər?!

RƏŞAD