Mahmud Qurbanov “Səbail”də baş məşqçi kimi cəmi 6 ay duruş gətirə bildi.

Football-plus.az xəbər verir ki, srağagün klub saytı onun postundan ayrılması ilə bağlı xəbər yaydı. Açığı, 49 yaşlı mütəxəssisin məhz indiki məqamda istefa verməsi futbol ictimaiyyəti üçün gözlənilməz oldu. Ancaq “dənizçilər”in rəhbərliyinin ötən mövsümün sonunda Aftandil Hacıyevlə müqavilənin müddətini uzadıb, bir neçə gündən sonra anlaşmaya verdiyini nəzərə alsaq, komandanı ölkə kubokunun yarımfinala yüksəldən çalışdırıcı ilə yolların ayrılması da qeyri-adi hal sayıla bilməz.

Maraqlıdı, niyə bu addım atıldı? Mahmud bəy özü istefa verdi, yoxsa göndərildi? Bu suala hələ də dəqiq cavab verən yoxdu. Ancaq yaşananlarla bağlı “Futbol+”ə ilginc məlumat daxil olub. Kluba yaxın mənbələrə inansaq, Azərbaycan Xəzər Dəniz Gəmiçiliyinin (ASCO) rəhbərliyi ilə Mahmud bəy arasında görüş dekabrın 27-də yox, 26-da olub. Və məhz həmin toplantıda onunla klubun himayədarı arasında fikir ayrılığı yaşanıb. Sponsor Qurbanovun qarşısına avrokuboka vəsiqə qazanmaq tələbi qoyub. Bundan başqa, tərəflər transfer məsələsində də ortaq məxrəcə gələ bilməyib. Şərtlərlə reallığın üst-üstə düşmədiyini rəhbərliyin diqqətinə çatdıran Qurbanov bu şərtlər altında işləyə bilməyəcəyini rəsmilərin diqqətinə çatdırıb. Bundan sonra baş məqşçinin istefası qəbul olunub.

Bunlar hamısı dekabrın 26-da olsa da, ictimaiyyətə bu xəbər bir gün sonra açıqlanıb. Niyə bir gün sonra? “Səbail” rəhbərliyi həmin 24 saatda yeni çalışdırıcı axtarışına çıxıb. Təyinatı dünən rəsmiləşən Şahin Diniyevin “dənizçilər”in yeni baş məşqçisi olacağı da dünən yox, artıq srağagün bilinirdi. Mahmud bəylə yolları ayıran ASCO rəhbərliyi kömək üçün AFFA-ya müraciət edib. Şahin bəyin assosiasiyadakı “çətir”i isə fürsətdən maksimum yararlanıb. Təxminən iki ay əvvəl onu “Kəpəz”ə göndərmək istəyən qüvvə onda gəncəlilərin təzyiqi ilə üzləşdiyindən bunu bacarmamışdısa, bu dəfə istəyinə nail ola bildi.

Sonda qeyd edək ki, Şahin Diniyevlə müqavilə 2023/24 mövsümünün sonuna qədər nəzərdə tutulub. Təcrübəli müəxəssis daha əvvəl "Qarabağ", "Kəpəz", "Rəvan" və milli komandanı çalışdırıb. AFFA Məşqçilər Komitəsinin üzvünün premyer-liqada son iş yeri 2017/18 mövsümündə "Kəpəz" olub.

RƏŞAD