Məlum olduğu kimi, dekabrın 28-də “Səbail”də Şahin Diniyev dönəmi başlayıb.

Təcrübəli mütəxəssis artıq bəzi addımlar da atıb. Sələfi Mahmud Qurbanovun komandadan göndərmək istədiyi Kizito Luvaqa, Maksim Çex və Qustavo de Fransanı heyətdə saxlayıb. Fakundo Kardoso isə klubdan ayrılıb. Yerli futbolçulardan Tural Bayramlı, Emin Zamanov və Vüsal Qənbərov da göndərilib. Bütün bu prosesləri nəzərə alaraq Şahin Diniyevlə söhbətləşməyi lazım bildik.

- Təyinatdan dərhal sonra biri legioner olmaqla 4 futbolçu ilə yolları ayırdız. Bunun səbəbi nədi?
- Komandaya gələndən sonra böyük dəyişiklik etmək istəmədim. Bir legioner və 3 yerli futbolçu ilə yollar ayrıldı. Hazırda futbolçu tapmaq çox çətindi. Yaxşı oyunçuları komandaya cəlb etmək, kollektivlə çempionata hazırlamaq çətin olacaq. Bu səbəbdən çox ciddi dəyişikliklər etmədik. Müdafiəyə Adil Nağıyevi cəlb edə bildik. Onu “Şamaxı”dan qaytardıq. Bundan əlavə, bir futbolçu da transfer etməyi düşünürük. Bu istiqamətdə də çox ciddi işlər gedir.

- Fakundo Kardosonun göndərilməsi gözlənilməz oldu. Çünki argentinalı yarımmüdafiəçi heç də pis oyun sərgiləmirdi...
- Mən statistikaya nəzər saldım. Kardoso az oyunda meydana çıxıb. Mənim üçün qərar qəbul etmək çətin idi. Lakin çətin olsa da, belə qərar verdim. Futboldu, gələn bir gün də gedir.

- Gedən oyunçuların əvəzinə kimləri gətirmək istəyirsiz? Bunlar legioner, yoxsa yerli futbolçular olacaq?
- Hələ ki konkret ad yoxdu. Fikrimizdə bəziləri var. Hazırda futbolçu transfer etmək də çətindi. Lakin bu işlə məşğul olan məsul şəxslərə göstəriş vermişəm. İstəyirəm ki, tanıdığımız, yerli futbolçular olsun. Onların çoxu müqavilə ilə klublarına bağlıdı. Legionerin kim və necə olduğunu isə bilmirik.

- Yəqin “Səbail”in çempionatdakı oyunlarını izləyirdiz.
- Nəinki “Səbail”in, premyer-liqanın bütün matçlarını Məşqçilər Komitəsinin üzvü kimi həmişə izləyirdik.

- Rəhbərliyin sizdən ilkin tələbi nə oldu?
- Burda tələb, istək yoxdu. Sadəcə, komandanın zəif çıxışı rəhbərliyi narahat edirdi. Göstərilən qayğı və şərait ilə komandanın mövqeyi tərs-mütənasib idi. Bu səbəbdən onlar da ilkin olaraq yaxşı mübarizə istəyirlər. Hazırkı durumda biz medallar, avrokuboklara vəsiqə uğrunda mübarizə apara bilmərik. Bu potensialda olan klublarla aramızda səviyyə fərqi var. İndiki məqamda istəyimiz sonuncu pillədən, yəni autsayderlər sırasından uzaqlaşmaqdı.

- Sizcə, komandanın hazırkı durumu buna imkan verəcək? Qısa müddət ərzində “Səbail” autsayderlər sırasından uzaqlaşmağı bacaracaq?
- Bəli. Oyun üslubunu və başqa şeyləri dəyişməklə bu məqsədə çatmaq mümkündü.

- Maraqlıdı, komandaya təyin olunarkən Mahmud Qurbanovla danışığınız oldu?
- Dünən Zaur Ramazanovla danışdım. Mahmud Qurbanova da zəng etdim. Lakin mənə dedilər ki, gözündən əməliyyat olunub. Bu səbəbdən onunla əlaqə yarada bilmədim. Allah şəfa versin. İnşallah, danışacam.

ŞAİR ABDULLA