"İlk yarı gərgin keçdi. Komandaları iki yerə bölərdim: çempionluq və avrokuboklar uğrunda mübarizə aparan ilk "5-lik" və sonuncu olmamaq üçün döyüşənlər. "Qarabağ" 1-2 oyunda müqavimətlə üzləşsə də, qalan matçlarda rəqiblərini üstələməklə şəriksiz lider oldu. Avrokubokda mübarizəni davam etdirməsi də komanda üçün ayrıca motivasiyadı. "Sabah" nə qədər büdrəyib, vacib xallar itirsə də, ümumilikdə qarşısına qoyulan maksimum hədəfə hələ ki nail olub. Murad Musayevin yetirmələri sərgilədiyi oyunla 2-ci yerə layiqdi. "Neftçi"nin vəziyyəti isə ürəkaçan deyil. Komandanın məzmunlu və məzmunsuz oyunlar bir-birini əvəz edir, qeyri-sabitlik göz oxşayır. Yalnız Emin Mahmudov istisnadı. Komanda fasilədə mütləq güclənməli və heyət tam komplektləşdirilməlidi. "Zirə" nə qədər əzmkar çıxış etməyə çalışsa da, uğursuzluqlardan qurtula bilmir. Zədəlilər, cəzalılar, ayrı-ayrı futbolçuların performansının aşağı olması "qartallar"ı geri atır. Komandanın liderləri Keyta ilə Rəhimdi. Heyətə səviyyəli futbolçular cəlb etməklə yanaşı, oyunçuların aqressivliyinə və çılğın davranışına da son qoymaq lazımdı. "Kəpəz"lə matçda da bunu əyani gördük. "Qəbələ" çempionatda ən baxımlı futbol sərgiləyən komandadı. Gəncəliləri ləngidən iki məqam var. Biri heyətin kasad olması, digəri müdafiədə bərbad oyundu. "Zirə"dən fərqli cəhətləri heyətin daha çox oturuşmuş olması və Elmar Baxşıyevin daha şən futbol oynatmasıdı. Amma mütləq güclü mərkəz müdafiəçisiylə güclənməlidilər. Urfan Abbasovun sıraya dönməsi də "Qəbələ"nin işini asanlaşdıracaq. Tovuz və Gəncə təmsilçiləri elitaya yeni qayıtsa da, Ayxan Abbasovun komandası daha uğurlu startla çoxları heyran etdi. Güclü azarkeş dəstəyi də “Turan Tovuz”un gücünə güc qatır. Bu komanda mövsümün əvvəlində vacib xallar topladı. "Kəpəz" isə əksinə, uğursuz başladı. Amma Tərlan Əhmədovun təyinatı təsirini göstərdi. Hazırda komandada oyanış hiss olunur. Son matçlarda baş məşqçi və futbolçuların birgə işi görünür. "Şamaxı" çempionatın gedişində toparlanmağa başladı. Cavid və Vüqar müəllim əsasən gənclərdən ibarət döyüşkən kollektivlə bütün komandalara “dişini göstərir”. Heyətdə ilk dəfə peşəkar karyeraya atılanlar var. Elvin Məmmədov, Adil Nağıyev və Rəşad Əzizli kimi təcrübəli futbolçuların olması da yaxşı haldı. Düşünürəm ki, fasilədə "Şamaxı" bir-iki təcrübəli futbolçunu da heyətinə qatsa, daha yaxşı olacaq. Mövsümə uğursuz başlayan "Sumqayıt"da baş məşqçi dəyişikliyi oldu. Samir Abasov komandanı yeni toparlamağa başlamışdı. Lakin 18-ci turda doğma meydanda "Sabah"a 0:6 hesabıyla uduzmaları onu göstərdi ki, "kimyaçılar"ın çox ciddi problemləri var. Odu ki, Samir müəllimin görəcəyi iş çoxdu. Komanda yenidən formalaşdırılmalıdı. İlk yarının ən acınacaqlı komandası isə "Səbail" oldu. Klubun maliyə vəziyyəti yaxşılaşdı, Mahmud Qurbanov kimi ölkə futbolunda nüfuzu olan sima baş məşqçi postuna gətirildi. Amma komanda olduqca uğursuz çıxış etdi. Transferlər, əsasən də legionerlər özünü doğrultmadı. Baş məşqçiyə həm rəhbərlik, həm də ictimaiyyət tərəfindən təzyiq var idi. Bunun nəticəsidi ki, Mahmud müəllim istefa verdi. Halbuki tələsmək lazım deyildi. Yeni baş məşqçi gəlmişdi, komanda yenidən qurulurdu, qarşıda ikinci yarı vardı. Fikrimcə, Mahmud müəllim özünü doğruldacaqdı. Kubokda "Sabah" kimi güclü rəqibi mübarizədən kənarlaşdırdılar. Komanda turnir cədvəlinin dibində olsa da, kubokda yarımfinala vəsiqəni təmin etdi. Bu isə gələcəyə nikbin baxmağa əsas verirdi. Amma fərqli yanaşma gördük. İndi "Səbail"in işi daha çətin olacaq. Yeni baş məşqçinin gəlməsi, öz prinsiplərini futbolçulara yeritməsi, arzuladığı heyəti formalaşdırması xeyli vaxt aparacaq. Ona görə də "Səbail"in 5-6-cı yerlərə qədər yüksəlməsi və kubokda uğurlu seriyanı davam etdirlməsi inandırıcı deyil. Sonda onu deyim ki, ötən illərlə müqayisədə səviyyə qalxıb, hər oyun gərginliyi ilə diqqəti çəkir. Qış fasiləsindən sonra bizi daha maraqlı oyunlar gözləyir”.