"Çempionatın ilk yarısı maraqlı keçsə də, yekun gözlədiyim kimi oldu. "Qarabağ" rəqiblərini üstələyərək vahid lider kimi fasiləyə yollandı. "Sabah" mövsümə iştahlı başladı, heyətin özəyini qorumaqla yaxşı transferlər də həyata keçirdi. Odu ki, Masazır təmsilçisi ilk yarını layiq olduğu yerdə tamamladı. "Neftçi" vacib xallar itirsə də, 3-cü yerdə qərarlaşmasını qənaətbəxş saymaq olar. Çoxları "ağ-qaralar"ı qınayır ki, ölkə futbolunun flaqmanıdı, yaxşı maliyyəsi var, çempionluğa oynamalı, ilk yarını ən azı 2-ci yerdə başa yekun vurmalı idi. Məsələyə real yanaşaq, komandaya yeni əcnəbi məşqçi gəlib, öz fəlsəfəsini, tələblərini futbolçulara yeritmək və sabit oyun üçün vaxt tələb olunur. Buna rəğmən, son oyunlarda "Neftçi" toparlandı, "Zirə" ilə kubokun cavab qarşılaşmasında meydanda sona qədər döyüşərək rəqibini mübarizədən kənarlaşdırdı. Ən əsası, "ağ-qaralar" 3-cü pillədə möhkəmlənib. Bu sadaladıqlarıma görə komandanın 3-cü yerdə olmasını pis göstərici saymıram. Çempionatın ikinci yarısında daha yaxşı çıxış üçün qış fasiləsində transferlər etməli və heyəti komplektləşdirməlidilər. "Zirə" ilə "Qəbələ" maksimun sabit çıxış etməyə çalışır. Hər iki komanda avrokuboka vəsiqə verən 4-cü yer uğrunda amansız mübarizə aparır. "Qəbələ" kubokda da mübarizəni davam etdirir deyə, avrokuboklara vəsiqə uğrunda mübarizədə, cuzi olsa da, "qartallar"dan daha şanslıdı. "Səbail"dən gözləntilər böyük idi, amma ümidləri doğrultmadı. Baş məşqçinin istefa verməsiylə komandanın işi daha da qəlizləşdi. "Turan Tovuz" çoxlarını təəccübləndirdi. Mübariz çıxışla 6-cı pilləyə qədər gəlib çatdı. Ayxan müəllim döyüşkən kollektiv formalaşdırıb, azarkleşlərin komandaya dəstəyi isə möhtəşəmdi. Tərlan Əhmədovun gəlişiylə "Kəpəz"də də dəyişikliklər hiss olundu. Komanda çempionatın gedişində uğurlu nəticələrlə son pillədən qurtuldu. Gəncə təmsilçisində ikinci nəfər açılıb. Fasilədən sonra daha güclü "Kəpəz" görəcəyik. "Şamaxı" ikinci dövrdə daha yaxşı çıxış etdi. Cavidlə Vüqarın məşqçi kimi işi artıq görünür. Bölgə təmsilçisinin gənc futbolçuları tədricən təcrübə toplayaraq kretiv futbol sərgiləməyə başladı. Ümumiyətlə, bütün gənclərin yaxşı çıxışı hamımızı sevindirir. Qış fasiləsində komandaların güclənməsindən də çox şey asılı olacaq. Qarşıda bizi daha maraqlı ikinci yarı gözləyir".