“Neftçi” ötən mövsümü vitse-çempion kimi başa vurdu.

Buna rəğmən, klub rəhbərliyi Samir Abasovun məşqçilik bacarığından narazı qalaraq onu yola saldı. Uzun sürən danışıqlardan sonra “sükan arxasına” rumıniyalı Laurentsiu Regekampf gətirildi. Əcnəbi mütəxəssis əvvəlcə avrokubokda ona güvənənlərin üzünü qara etdi, indi də komandası cari çempionatda qeyri-sabit çıxışla diqqəti çəkir. “Ağ-qaralar” 15 turdan sonra 10 qələbə, 2 heç-heçə, 3 məğlubiyətlə turnir cədvəlində 3-cü pillədə qərarlaşıb. Təbii ki, bu çempionluğa oynayan komanda üçün bərbad nəticədi. Bakılılar özündən öndə olan “Qarabağ”la “Sabah”dan yalnız xal fərqinə yox, sərgilədiyi oyuna görə də geri qalır. Onların bu gedişlə 3-cü pillədə qalıb-qalmayacağı da sual altındadı. Regekampfın komandasını “Zirə” ilə “Qəbələ” izləyir. Hər iki komanda avrokuboka iddialıdı və sona qədər bu hədəf uğrunda mübarizə aparacaqları şübhə doğurmur. Qısası, “Neftçi” adına layiq çıxış etmir.

Amma komandanın kapitanı Emin Mahmudov cari mövsümdəki performansına görə xoş sözlərə layiqdi. “8 nömrə” “Neftçi” donanmasının batmaması üçün təkbaşına mübarizə aparır desək, yanılmarıq. Kapitan ampluaca pleymeyker olsa da, onu meydanın hər yerində mübarizə aparan görürük. Yığma üzvü yeri gələndə həm müdafiəçi, həm dayaq yarımmüdafiəçisi, həm oyun qurucusu, həm də hücumçu kimi çıxış edir. Sadalananlarla yanaşı, qol duyumu da yüksəkdi. 15-ci turda “Neftçi”nin “Səbail” üzərində 3:1 hesablı qələbəsinin memarı da məhz Mahmudov oldu. Kapitan hər 3 qolun müəllifi olmaqla həm mövsümdə, həm də “ağ-qaralar”ın heyətində ilk het-trikini rəsmləşdirdi, vurduğu qolların sayını 9-a çatdırdı və hazırda bombardirlər yarışında 3-cü sırada qərarlaşıb. Ötən mövsümlə müqayisədə xeyli “artıraraq” əla performans sərgiləyir. 2021/22 mövsümündə Emin 27 oyuna 5 qol vurmuşdusa, hazırda 15 matçda 1260 dəqiqə meydanda olmaqla 9 qola imza atıb. Futbolçu yalnız 1-ci turda, “Şamaxı” ilə səfər matçında sonradan meydana çıxaraq 20 dəqiqə oynayıb. Qalan qarşılaşmaların hamısına start heyətində çıxıb və əvəzlənməyib. Onun qarşıdakı 21 turda qollar vuracağı da istisna deyil. “8 nömrə” klubuyla yanaşı, yığmada da üstün oyunu və vurduğu qollar ilə göz oxşayır.

Tanınmış amerikalı boksçu Mayk Tayson deyir: “Sıxıntılı vaxtlarımda tez-tez özümə xatırladıram ki, təslim olsan, yaxşı olmayacaq”. “Neftçi”dən fərqli onun kapitanı ən çətin, ağır, böhranlı dövrlərdə belə döyüşür və təslim olmaq haqda düşünmür. Odu ki, hazırda çempionatda “Neftçi”ni təkbaşına Emin Mahmudov təmsil edir demək daha ədalətli olar.

ABDULLA İSMAYILOĞLU