Aftandil Hacıyev komandaları iki qrupa böldü
Misli premyer-liqasında iki tur araxa qaldı.
Yenə bir-birindən maraqlı oyunlar izlədik. Bununla belə, "Qarabağ"la "Sabah" xaric, qalan komandalar haqda ciddi nəsə demək tezdi. Elə ilk iki turu dəyərləndirmək üçün müraciət etdiyimiz Aftandil Hacıyev də eyni fikirdədi: "Əvvəla onu deyim ki, 2 tura görə komandalara qiymət verib, iddiaları barədə danışmaq tezdi. Buna baxmayaraq, müşahidələrimi bölüşəcəm. Yeni mövsümdə komandaların sayının artması xoş haldı. Qərb bölgəsi futbol diyarı olaraq çempionatımıza daim rəng qatıb, bundan sonra da qatacaq, "Turan Tovuz"la "Kəpəz" premyer-liqanı maraqlı etdi. "Qarabağ"ın gücü hamıya bəllidi, İkinci heyətlə oynasa belə, qarşısında tab gətirən yoxdu. Ağdam təmsilçisi artıq Avropa səviyyəli komandadı. "Sabah"dan bu mövsüm iddialı çıxış gözləsəm də, belə başlanğıc gözləmirdim. Komanda qələbələri məhsuldar və baxımlı oyunla rəsmləşdirir. Səfərdə "Zirə"ni 3:1 məğlub etmələri bir daha göstərdi ki, iştahları böyükdü. Rəşad Sadıqovun komandası mövsümə sanki tam hazır deyil. "Qartallar"ın keçirdiyi 2 oyuna baxsaq, xətlərarası əlaqənin zəif olduğu gözə çarpır. Amma əminəm ki, Rəşad müəllim tezliklə komandanı toparlayacaq. "Qəbələ"nin ötən mövsümdən sərgilədiyi baxımlı oyununu davam etdirəcəyi şübhə doğurmur. "Neftçi" üçün avrokubok estafeti bitdiyindən bütün gücünü çempionata yönəldəcək. "Səbail" heyətini gücləndirsə də, çempionata uğursuz başladı, amma komandada yeni baş məşqçi və yeni futbolçular olduğundan kollektiv hələ tam formalaşmayıb. İnanıram ki, tədricən öz oyununu tapacaq. "Şamaxı" bu mövsüm fərqli strategiya seçdi, yerli oyunçulara üstünlük verdi. Yeni baş məşqçi gətirildi. Lakin onların "Neftçi" ilə oyunlarına nəzər yetirsək, gənc kollektiv pis təsir bağışlamadı, öz səhvlərindən məğlub oldular. Ədalətli nəticə heç-heçə idi. Bölgə təmsilçisi "Qəbələ" ilə səfər matçının 2-ci hissəsində də mübariz oyunla diqqəti çəkdi. Hətta ilk qollarını da vurdular. Həmin sözləri çoxlarının ausayder gözü ilə baxdığı "Kəpəz" haqda da demək olar. Komanda, uduzmasına baxmayaraq, sona qədər mübarizə aparır. Ev matçlarını doğma meydanda keçirsələr, indikindən daha yaxşı oynayacaqlarına əminəm. "Turan Tovuz" çoxlarına başağrı olacaq. Ayxan Abbasovun məşqçi bacarığını, xarakterini hamı yaxşı bilir. Onun "Zirə" və "Sumqayıt"dakı fəaliyyətini xatırlatmaq bəs edir. Ümumilikdə çempionatda çıxış edən komandalarımızın çıxışı belə olacaq: ilk “5-lik” üçün mübarizə aparanlar və ikinci “5-lik”də döyüşənlər. İlk “5-lik” çempionluq və avrokuboklar uğrunda oynayacaq. İkinci “5-lik”də isə autsayder olmamaq üçün mübarizə gedəcək. Amma düşünürəm ki, ikinci “beşlik”dəki daha güclü komada ilk “beşliy”ə sıçrayış edə bilər. Hələ ki çempionatımız pis start götürməyib, məhsuldar oyunlar izləyirik”.
Təcrübəli mütəxəssis yeniliyə də toxundu: “VAR sisteminin tətbiqi də, düşünürəm ki, premyer-liqamızda inkişafa gətirəcək. Marafon böyükdü, bizi qarşıda maraqlı oyunlar, nəticələr, sensasiyalar gözləyir. Bütün komandalarımıza uğurlar arzulayıram".
ABDULLA İSMAYILOĞLU
Digər xəbərlər
