Məlum olduğu kimi, Brittni Qrayner Rusiya həbsxanasında keçirdiyi 293 gündən sonra ABŞ-a qayıtdı.

Çoxları ikiqat olimpiya çempionunun onu və ailəsini çətin günlərdə dəstəkləyən mediaya geninə-boluna müsahibələr verəcəyini gözləyirdi. Ancaq 32 yaşlı basketbolçu hələ ki bir neçə sitatla kifayətlənib. Və dedikləri da qalmaqal xarakterli deyil. Birincisi, Brittni aydın şəkildə anladıb ki, karyerasını davam etdirmək istəyir və klubunu dəyişmək niyyəti yoxdu. O, mərkəz oyunçusunu 2013-cü il draftında seçən “Finiks”lə yeni müqavilə bağlayacaq. İkincisi, Qrayner ABŞ prezidenti Co Baydeni vətəndən kənarda dustaq həyatı yaşayan bütün amerikalıları qaytarmağa çağırdı. Basketbolçu casusluğa görə Rusiyada 16 il həbs cəzası alan Pol Uilanın dəyişdirilməsinə yardım etməyə hazırdı.

“Merkuri”yə sadiqlik

Qrayner 2013-dən bəri qadın MBA-sında çıxış edir. Xatırladaq ki, okeanın o tayında çempionat uzun çəkmir, adətən, mayın sonundan oktyabrın ortalarına qədər davam edir. WNBA-nın əsas ulduzları qalan vaxtı Rusiya (2022/23 mövsümündən MBA klubları oyunçularına Rusiya təmsilçiləri ilə müqavilə bağlamağı qadağan edib – red.), Çin, Türkiyə, İspaniya, Polşa, İsrail klublarında keçirirlər. Qrayner də karyerası boyunca belə edib. Peşəkar səviyyədəki ilk iki mövsümdə Çində oynayıb, 2015-dən bəri isə UQMK-nın şərəfini qoruyub. O, Yekaterinburqda 4 dəfə Avroliqanın qalibi, 6 dəfə isə Rusiya çempionu olub. Bu tarixçədə ən vacib nüanslardan biri puldu. Brittni MBA-da mösüm ərzində 200 min dollar qazanıbsa, Rusiyada bu məbləğ milyona yaxındı.

“Şeremetyovo” hava limanındakı narkotiklə bağlı insidentdən sonra Qrayner bir də çətin ki ABŞ-ı tərk etmək fikrinə düşə. Ancaq karyerasını davam etdirəcəyi dəqiqdi: “Bir məsələni aydınlaşdırmaq istəyirəm: bu mövsüm “Finiks Merkuri”nin heyətində basketbol oynamaq niyyətindəyəm. Həmçinin ictimaiyyət önündə məni dəstəkləyən, sosial şəbəkələrdə dəstək xarakterli paylaşımlar edən adamlara “sağ ol” demək imkanını səbirsizliklə gözləyirəm. Tezliklə belə imkanım olacaq”.

Qraynerin dedikləri “Merkuri” üçün yaxşı xəbərdi. O, ABŞ-dakı karyerası ərzində yalnız bu klubda çıxış edib və liqada keçirdiyi ikinci ildə (2014/15 mövsümü) çempion titulunu qazanıb. İkiqat olimpiya çempionu hazırda azad agentdi və WNBA tarixinin ən yaxşı oyunçularından biri statusunu da nəzərə alsaq, bu liqada çıxış edən qalan 11 klubdan hər birini seçə bilərdi. Məsələn, “Los-Anceles Sparks”ı, “Nyu-York Liberti”ni və ya “Vaşinqton Mistiks”i. Amma “Finiks”də qalmağa üstünlük verdi. Və indi 2023-ün mayına qədər idman formasını bərpa etməyə çalışacaq.

“Merkuri” yeni mövsümdəki ilk oyununu mayın 19-da səfərdə “Sparks”la keçirməli, 4 gün sonra isə ilk ev oyununda “Çikaqo Skay”ı qəbul etməlidi. Olimpiya çempionu, qadın MBA-sında Ulduzların oyununun iştirakçısı Nafisa Kollier əmindi ki, Qraynerin hər oyununda tribunalar dolu olacaq: “O, KİV-in və azarkeşlərin böyük diqqəti ilə qarşılanacaq. Düşünürəm ki, yeni mövsümdə “Merkuri”nin bütün oyunlarında anşlaq olacaq”.

Adətən, qadın MBA-sında oyunlar fanatların böyük diqqəti ilə müşayiət olunmur. Uzaqbaşı final oyunlarında anşlaq yaşanır, o da həmişə yox.

Yeni missiya

Hərçənd ictimai rəy sorğuları göstərir ki, amerikalıların yarısı ABŞ hökumətinin Qrayneri rusiyalı Viktor Butla dəyişmək qərarını dəstəkləmir. Respublikaçı seçicilərin üçdəikisindən çoxu (69 faiz) bu sövdələşmənin əleyhinə çıxıb. Yarıdan çoxu (51 faiz) dəyiş-düyüşün qəti əleyhinədi. Demokratlar əsasən dəstəkləsə də, “qəti şəkildə lehinəyəm” variantını seçənlər yalnız 34 faiz təşkil edib. Müstəqil seçicilərin, demək olar ki, yarısı (48 faiz) dəyiş-düyüşün əleyhinə çıxıb. Əksər amerikalıları razı salmayan məqam budu ki, Qrayner 2020-nin iyununda casusluğa görə Rusiyada həbs cəzası alan sabiq dəniz piyadası Pol Uilandan əvvəl dəyişdirilib. Yeri gəlmişkən, Uilanın vəkili Vladimir Jerebenkov müştərisinin belə duruma anlayışla yanaşdığı haqda açıqlama verib: “Amerika tərəfi iki ay əvvəl Uilanla Qrayneri Butla dəyişmək barədə təklif irəli sürüb. Ancaq Rusiya tərəfi yalnız bir adamın bir adamla dəyişdirilməsinə hazır idi. Belədə amerikalılar Qraynerə üstünlük verdi, qadın olduğuna görə. Qadının birinci dəyişdirilməsi daha humanist addımdı”.

Qrayner özü də Polun vətənə qayıtmasına yardım etməyə çalışacağını deyir: “Prezident Bayden, siz məni evə qaytardız və bilirəm ki, Pol Uilanı və qalan amerikalıları da qaytarmaq niyyətindəsiz. Sizə yardım etmək üçün əlimdən gələni əsirgəməyəcəm. Həmçinin evə dönüşümdə rol oynayan hər kəsi ABŞ-ın qalan vətəndaşlarının da qaytarılması işində səylərini davam etdirməyə çağırıram. Hər ailə bütünləşməyi haqq edir”.

Xatırladaq ki, Qrayner bu il fevralın 17-də “Şeremetyovo”da saxlanılmışdı. Gömrük işçiləri onun qabında həşiş yağı aşkara çıxarmışdı. Məhkəmə avqustda idmançıya narkotik qaçaqmalçılığı ittihamı ilə 9 il həbs cəzası kəsdi və milyon rubl cərimələdi. Noyabrda apellyasiya şikayəti də rədd olunan Qrayner Mordoviyadakı islah-əmək müəssisəsinə göndərildi. O, Rusiyadakı istintaq təcridxalanalarında və kolonda 10 aya yaxın qaldı. Dekabrın 8-da basketbolçu silah taciri Butla dəyişdirilərək vətəninə döndü.