Qrayner Yavas qəsəbəsində saxlanılır
Həşiş yağının qaçaqmalçılığı ittihamı ilə Moskvada həbs olunan və 9 il cəza alan Brittni Qraynerin hansı islah-əmək müəssisəsinə göndərilməsi haqda bilgi olmadığını vurğulamışdıq.
Football-plus.az xəbər verir ki, artıq ikiqat olimpiya çempionunun hara aparıldığı məlumdu. “Reuters”in xəbərində amerikalı basketbolçunun Mordoviyaya aparıldığı, Yavas qəsəbəsində yerləşən islah kolonunda saxlanıldığı bildirilir. 32 yaşlı Qraynerin vəkilləri Mariya Blaqovolina ilə Aleksandra Boykova da adı çəkilən agentliyin xəbərini təsdiqləyib:
“İlk növbədə Brittninin adında ona görə narahat olan hər kəsə təşəkkür etmək istəyirik. Son bir neçə gündə dəstək xarakterli çoxlu mesaj almışıq. Brittninin Mordoviyadakl 2 saylı islah-əmək müəssəsində cəzasını çəkməyə başladığını təsdiqləyirik. Bu həftənin əvvəlində ona baş çəkmişik. Brittni nə qədər mümkündüsə, o qədər də vəziyyətin öhdəsindən gəlməyə, yeni şəraitə uyğunlaşmağa çalışır. İndi onun üçün çox çətin dövr olduğunu nəzərə alsaq, yaxın günlərdə bu mövzuda biz tərəfdən hansısa açıqlama olmayacaq”.
Xatırladaq ki, ikiqat olimpiya çempionu fevralın əvvəlində ABŞ-dan Rusiyaya dönərkən “Şeremetyovo” hava limanında saxlanılıb.
