“Getdikcə daha yaxşı olacağıq” - Samir Abasov
Misli premyer-liqasında 10-cu tura yekun vurulub.
“Qarabağ” “Sumqayıt”ı məğlub edib - 3:1. Oyundan sonra “gənclik şəhəri” təmsilçisinin baş məşqçisi Samir Abasovun mətbuat konfransı keçirilib. Sizi mütəxəssisin fikirləri ilə tanış edirik:
“Bugünkü halımızda “Qarabağ”a qarşı oynamaq həddən artıq çətindi. İlk hissədə müdafiədə oyunumuz yaxşı idi. Bəzi oyunçuların gücü bitəndən sonra qollar buraxdıq. Xoş tərəfi odu ki, nəhayət, qol vura bildik. Getdikcə daha yaxşı olacağıq. Buna əminəm. hücum xəttində kreativ, oyunu üzərinə götürə biləcək futbolçularımız yoxdu. Çıxış yolu kollektiv oyun göstərməkdi. Bu gün müdafiədə bunu etməyi bacardıq. Bu gün işimiz komandanı stressə salmamaq və vəziyyətdən çıxmağa çalışmaqdı”.
- Komanda ilk dəfə oyundan qol vurdu. Bunu irəliləyiş hesab edirsiz?
- Mənim üçün xoş olmayan təbrikdi. Son 3 oyunu analiz etməliyik. Əvvəlki matçlar barədə heç nə deyə bilmərəm. Belə oyunlar bizə fayda verəcək. Müəyyənləşdirməliyik ki, hansı oyun üslubu bizim üçün daha uyğundu. Gec olsa da, hələ axtarışdayıq.
- Qışda hücuma yeni oyunçu transferi olacaq?
- Tək hücumdan danışa bilmərəm. Qışı ən səbirsizliklə gözləyən insanlardan biriyəm. İndi nə qədər çox oyunçu qazana bilsək, işimiz yüngülləşər. Qurduğumuz oyunu başa düşməyənlər çoxluq təşkil etsə, nəinki qışı, yayı da gözləməli olacağıq.
- Aleksey Baqa dəfələrlə demişdi ki, bu heyəti mən yığmamışam. Siz də deyirsiz ki, qışı gözləyirsiz. Qışda heyəti öz ideyalarınızla quracağınıza dair rəhbərliklə razılığınız varmı?
- Baqanın dediklərinə şərh vermək istəmirəm. Tutaq ki, eyni şeyi mən deyirəm. Adama sual verərlər ki, bəs sən orada neynirsən? Belə şeylər yoxdu. Onu demək özünü ləkələməkdi. Bu dəqiqə pozitiv olmağımın arxasında rəhbərlik dayanıb. Hamımız istəyirik ki, bu vəziyyətdən çıxaq. Məndən çox onlar çalışırlar ki, necə edək, daha yaxşı olaq. Məndən başqa heç kim komandanı yığmayacaq.
Digər xəbərlər
