Misli premyer-liqasında 9-cu tura yekun vurulub.

Son matçda "Sabah" "Kəpəz"i darmadağın edib - 5:0. Oyundan sonra qonaqların çalışdırıcısı Tərlan Əhmədovun mətbuat konfransı keçirilib. Sizi mütəxəssisin fikirləri ilə tanış edirik:

- "Kəpəz" ən çox qol buraxan komandadı. Siz isə vaxtilə ən yaxşı müdafiəçilərdən olmusuz. Bu, ironiya deyilmi?
- Kimisə günahlandırmaq istəmirəm. Düzdü, müdafiədə çoxlu boşluqlar var. Mən gələndə komandanın fiziki durumu çox pis idi. Bunu yavaş-yavaş düzəldərik. Müdafiədə kobud səhvlər var. Komanda müdafiə olunmağı bacarmır. Fərdi keyfiyyətləri olan oyunçular lazımdı. Yeni nəfəs, yeni oyunçular lazımdı ki, boşluqları dolduraq. Bunlar olandan sonra nəsə etmək, stabil oynamaq olar. Anidən nəyisə dəyişmək olmur. Komandanın potensialı var. Son oyunlardakı çıxışımız bunu deməyə əsas verir. Fərdi səhvlərimiz çoxdu. İstəmərəm ki, belə şeylər olsun. Səhvlər qaçılmazdı.

- Qapıya düzgün zərbə endirə bilmədiz. Bu, nə ilə bağlıdı?
- Fərdi keyfiyyətlə bağlıdı. "Qarabağ"da Kadi Borqes uzaqdan dəqiq zərbələr endirə bilir. Ondan başqa kimdəsə belə bacarıqlı oyunçu yoxdu. Görüləcək işlərimiz var. Ən az qol vuran və ən çox buraxan komandayıq. Birinci hansını düzəldək? Görüləsi işlər həddindən artıq çoxdu. Buna görə komandanı qura bilmirik. Nəyisə dəyişirəmsə, deməli mənə zaman lazımdı. Müdafiədə səhvlər olmamalıdı, hücumda daha aqressiv olmalıyıq. Futbolçu özü mövqeyini yaradıb zərbə endirir. Hansı futbolçuya deyirlər ki, rəqibi keç, zərbə vur? Bəlkə də, oyunçuların özünə inamı yoxdu. Komandanı quraq, digər işlər düzələr.