İkardi yenə Argentinaya qaçdı
“Qalatasaray”da Mauro İkardi ilə Serxio Oliveyranın zədələndiyini xəbər vermişdik.
Bu iki futbolçu ilə yanaşı, Ayhan Akmanın oğlu Həmzə Akman, eləcə də Milot Raşitsa, Əmrə Taşdəmir, yenicə müqavilə müddətini artıran Yunus Akgün və Mattias Rossun da müxtəlif tipli zədələri var.
Football-plus.az xəbər verir ki, “Cim-Bom”un baş həkimi Yenər İncə jurnalistlərin önünə çıxaraq bu futbolçuların son durumu barədə məlumat verib. Akman, Raşitsa, Taşdəmir və Akgün bir neçə gün ərzində komanda ilə birlikdə məşqlərə başlayacaq. Oliveyranın konkret nə vaxt qayıdacağı bilinməsə də, Ross hələ ən azı 1 ay da topa toxuna bilməyəcək.
Fanatların aqibəti ilə ən çox maraqlandığı İkardi ilə bağlı isə yeni xəbərlər var. Təcrübəli argentinalı forvardın təxminən 1 həftə əvvəl müalicə üçün vətəninə yollandığı məlum olub. Bu artıq İkardinin “Qalatasaray”a transfer olunduğu gündən bəri Argentinaya 2-ci səfəridi. O daha öncə oktyabrın 4-də də rəhbərliyin icazəsi ilə vətəninə yolanmışdı. Yenər İncə İkardi ilə bağlı bunları deyib:
“Müalicəsinin ilk bölümü çox yaxşı keçir. Onunla hər gün danışırıq. Hər şey nəzarətimiz altındadı. İlk bölüm tamamlandıqdan sonra Türkiyəyə qayıdacaq. Biz də son durumuna baxıb yeni addımımızı müəyyənləşdirəcəyik”. Bəlkə də İkardinin həyatında Vanda Nara adlı bir qadın olmasaydı, onun vətəninə yollanması bu qədər ajiotaj doğurmazdı. Amma gah ayrılan, gah birləşən, gah boşanan, gah da barışan bu populyar cütlük bu aralar yenə küsülüdü. Türkiyə mətbuatı isə iddia edir ki, Mauro “Qalatasaray” rəhbərliyinə mesaj göndərərək bir qədər gec qayıdacağını bildirib! Bunun səbəbi isə odu ki, İkardi Milad bayramını uşaqları ilə birlikdə keçirmək istəyir. Onlar boşandıqları üçün Vandanın bununla bağlı yazılı icazəsi olmalıdı və o, buna icazə vermir. Bundan başqa, dekabrın 9-da Naranın öz ad gününə Mauronu dəvət etmədiyi məlum olub. Hərçənd ad günündə Vandanın yeni sevgilisi olduğu iddia edilən reper L-Gante də iştirak etməyib. Qısası, 6 superliqa matçında 4 qol, 2 məhsuldar ötürməlik performans sərgiləyən məşhur forvardın Türkiyəyə nə vaxt qayıdacağı bəlli deyil. Baş məşqçi Okan Buruk isə məsələ ilə bağlı bunları deyib: “Dünyada bunun örnəkləri az deyil. Bəzi oyunçular müqavilədə əvvəlcədən qeyd edirlər ki, zədə təqdirində öz ölkələrində müalicə alacaqlar. Hər şey nəzarətimizdədi. Bizim üçün əsas oyunçunun sağlam şəkildə geri dönməsidi”.
