Futbol dünyasının ən məşhur cütlərindən olan Mauro İkardi ilə Vanda Naradan yenə qəribə xəbərlər var.

Bilindiyi kimi, argentinalı forvard “Qalatasaray”a transfer olunandan bir müddət sonra meneceri və həyat yoldaşı Vanda Nara sürpriz şəkildə ondan ayrıldığını açıqlamışdı. İkili sosial şəbəkələrdə bir-birinin şəklini silmiş və bir-birini təqibdən çıxarmışdı. Vanda vətəni Argentinaya yollanmış və reper L-Gantenin klipində çəkilmişdi. Onların eşq macərası yaşadığı iddia edilmişdi. Mauro hətta “Qalatasaray” rəhbərliyinin icazəsi ilə Argentinaya yollanaraq həyat yoldaşını “ağıllandırmağa” çalışsa da, istəyinə çata bilməyərək tək-tənha İstanbula qayıtmışdı. Onların tezliklə boşanacağı güman edilsə də, bir müddət öncə Vanda Naranın Türkiyəyə gəldiyi məlum olmuşdu. Hətta bu xanım “Qalatasaray”ın Türkiyə kubokunun 4-cü mərhələsində evdə “Ofspor”a qarşı keçirdiyi oyunu tribunada İkardi ilə birlikdə izləmişdi. Son xəbərlərə inansaq, ilk baxışdan bu ikili yenidən barışıb! İlk addımı yenə də İkardi atıb. Çünki Türkiyə mətbuatına inansaq, Vanda İstanbula ayaq basarkən Mauro onu içi güllə dolu olan bir “Limuzin” ilə qarşılamışdı. Bu hadisədən sonra onların münasibətləri qaydasına düşməyə başlamışdı. Həm də məlum olub ki, bu ikili ən sevdikləri yer olan Maldiv adalarına birlikdə istirahətə yollanıblar. Düzdü, İkardi ilə Nara sosial şəbəkədə hələ də bir-birini təqib etmir və birlikdə şəkil paylaşmırlar. Amma “instaqram”dakı son paylaşımlarından belə bəlli olur ki, hazırda onların ikisi də Maldiv adalarındadı.

Bu xəbərlərin dolaşdığı bir vaxtda dünyanın ən populyar jurnallarından olan “Vanity Fair”in dünənki sayında Vanda Naranın geniş müsahibəsi işıq üzü görüb. 36 yaşlı xanım müsahibədə artıq onların hər ikisinin boşanma kağızını imzaladığını vurğulayıb! Vanda İkardi ilə aralarındakı problemlərin onun argentinalı model Çayna Suares ilə mesajlarını ifşa etməsindən sonra başladığını vurğulayıb və bir-birini hələ də sevmələrinə rəğmən, evdə çox ağır atmosfer olması üzündən belə qərar verdiklərini deyib. Hərçənd Mauronun bundan başqa da yanlış hərəkətlərinin olduğuna işarə vurub. Vanda həm də bildirib ki, işi ilə bağlı ailəsindən ayrılmaq və vətəninə yollanmaq məcburiyyətində qalırdı ki, bu da Mauronun xoşuna gəlmirdi. Vanda bir çox futbolçunun həyat yoldaşlarından fərqli karyerasını davam etdirmək arzusunda olduğunu da vurğulayıb. Ən əsası Vanda L-Gante ilə aralarında heç bir münasibətin olmadığını və hər şeyin mətbuat tərəfindən şişirildiyini deyib.