Misli premyer-liqasının 10-cu turu da geridə qaldı.

Hakimlər ümumilikdə 21 dəfə əlini cibinə atdı. Bunlardan birində birbaşa qırmızı vərəqə ilə “Kəpəz”in futbolçusu Zamiq Əliyev meydandan kənarlaşdırıldı. Daha bir epizodda “Zirə”nin futbolçusu Coşqun Diniyev ikinci “sarı”nı alaraq oyunu yarımçıq tərk etdi. 19 dəfə isə hakimlər futbolçuları və 1 rəsmi şəxsi sarı vərəqə ilə cəzalandırdı. Turun ən intizamlı komandaları “Səbail”, “Sabah”, “Qarabağ” və “Sumqayıt”dı. Onların hərəyə bir futbolçusu “sarı” ilə cəzalandı. Tutun ən intizamsız komandaları isə “Kəpəz”lə “Neftçi”di. Gəncə təmsilçisinin bir futbolçusu sarı, biri isə qırmızı vərəqə ilə cəzalanıbsa, “Neftçi”dən 5 futbolçu “sarı” alıb. Reportyorlarımızın qeydlərinə keçid alaq.

Kəpəz – Neftçi, TURAL QURBANOV
Uzun müddətdən sonra Gəncə şəhər stadionunda baş tutan tarixi derbini Tural Qurbanov idarə etdi. Oyun gərgİN keçdi ki, bu da hakimlərin işini bir qədər çətinləşdirdi. 59-cu dəqiqədə Kantariya cərimə meydançasında rəqibin iki futbolçusu ilə mübarizədə yerdə qalsa da, baş hakim davam işarəsi verdi. 61-ci dəqiqədə isə futbolçular arasında baş verən gərginlik zamanı haqlı olaraq Zamiq Əliyevə “qırmızı” verərək meydandan kənarlaşdırdı. Futbolçu Kenni Sayefə hücum çəkərək zərbə endirmişdi. Ümumilikdə Qurbanov nəticəyə təsir edən səhvə yol vermədi, oyunu normal idarə etdi.

Sabah – Zirə, ELÇİN MƏSİYEV
Hakim oyunun tempinin aşağı düşməsinə imkan vermədi. Amma 84-cü dəqiqədə qonaqların futbolçusu Coşqun Diniyevi 2-ci sarı vərəqə göstərməklə meydandan qovması bir qədər mübahisəlidi. Həmin epizodda yerdə qalan oyunçuya etiraza görə rəsmi xəbərdarlıq etməyə bilərdi. Bunu nəzərə almasaq, Məsiyev normal idarəçiliklə yadda qaldı.

Qarabağ - Sumqayıt, ƏLİYAR AĞAYEV
İlk yarı o qədər də maraqlı keçmədi. Lakin hakim qərarı bəlkə də nəticəyə təsir etdi. Əliyar Ağayev 15-ci dəqiqədə Almir Aqanspahirçə qarşı olduqca kobud oynayan Ozobiçi sarı vərəqə ilə cəzalandırdı. Təkrara baxanda milli üzvünün hücumçuya açıq ayaqla müdaxilə etdiyi görünür. Bunun cəzası qırmızı vərəqə olmalıydı. Ağayev "sarı" ilə kifayətləndi. Əslində isə bu VAR hakiminin səhvi idi. Orda əsas qərarı Rəvan Həmzəzadə verirdi. O, epizodu dəqiq dəyərləndirmədiyi üçün "Sumqayıt"a qarşı haqsızlıq oldu. Penalti epizodu zamanı da Ramil qol vurmuşdu. Hakim üstünlük prinsipindən yararlanıb oyunu davam etdirə bilərdi. Lakin Əliyar daha dəqiq qərarın verilməsi üçün penalti təyin etdi.

Turan Tovuz – Səbail, KAMAL UMUDLU
Tovuzda keçirilən və heç-heçə bitən matçda Kamal Umudlu nəticəyə təsir edən ciddi səhvə yol vermədi. 90 dəqiqə ərzində hadislərin mərkəzinə yaxın olmağa, sərt oyunun kobudluğa çevrilməməsinə çalışdı. Xırda nöqsanları nəzərə almasaq, işinin öhdəsindən gəldiyini söyləmək olar. Göstərdiyi vərəqələr, verdiyi penalti qərarı düzgün idi. Mübahisəli epizodlardan VAR-ın köməyi ilə üzüağ çıxmağı bacardı.

Şamaxı - Qəbələ, RAUF ALLAHVERDİYEV
Nəticəyə görə "şirlər" sevinə bilər. Oyunun idarəçiliyi də pis olmadı. Rauf Allahverdiyevin və köməkçilərin qərarları doğru idi. Referi hadisələrə vaxtında müdaxilə edir və tempin düşməsinə imkan vermirdi. Lakin görüşün sonlarında "Qəbələ"nin futbolçusu Roman Maçadonun zərbəsindən sonra top Cəlal Hüseynovun dirsəyinə dəydi. "Qəbələ"nin ehtiyat oyunçular skamyasında yer alanlar epizoda yenidən baxandan sonra hakimə etiraz edərək penalti tələb etdi. VAR-ın müdaxiləsindən sonra Allahverdiyev matçı davam etdirdi. Epizodun təkrarına baxanda referinin və VAR hakiminin doğru qərar verdiyini söyləyə bilərik.