Misli premyer-liqasında 8-ci turu da geridə qoyduq.

5 oyunda baş hakimlər ümumilikdə 18 dəfə futbolçuları sarı vərəq ilə cəzalandırdı. Bunlardan biri ikinci “sarı” ilə “qırmızı”ya çevrildi. Turun ən kobud komandaları “Kəpəz”lə “Səbail”di. Gəncəlilərin 4 oyunçusu “sarı” ilə cəzalanıb. “Səbail”in 3 futbolçusu sarı vərəqə ilə cəzalanıbsa, biri də ikinci “sarı” ilə meydandan qovulub. Turun ən intizamlı komandası isə “Turan Tovuz”du. Tovuzluların heç bir futbolçusu “Zirə” ilə matçda cəzalanmayıb. Reportyorlarımızın qeydlərinə keçid alaq.

Səbail – Qəbələ, FƏRİD HACIYEV

Referi görüşü ciddi səhvsiz idarə etdi. 43-cü dəqiqədə haqlı olaraq “Səbail”in futbolçusu Qustavo de Fransa ikinci sarı vərəqə ilə meydandan kənarlaşdırıldı. 49-cu dəqiqədə isə meydan sahiblərinin qapısı qarşısında “Qəbələ”nin müdafiəçisi Murad Musayevə qarşı qayda pozuldu. Baş hakim oyunu davam etdirsə də, VAR-a baxandan sonra 11 metrlik cərimə zərbəsi təyin etdi. Epizodun təkrarına baxanda da Fərid Hacıyevin qərarında haqlı olduğu görünür. Daha bir penalti isə “Qəbələ”nin qapısına təyin olundu. Futbolçular buna etiraz etsə də, təkrarda Renatonun Zakpaya qarşı qaydanı pozduğu görünür. Beləliklə, Hacıyev 8-ci turun açılış matçını ciddi səhvlər olmadan idarə etdi.

Şamaxı – Sabah, TURAL QURBANOV

Matç yetərincə aşağı tempdə keçdiyinə görə Tural Qurbanovun da nəticəyə təsir edən qərarları olmadı. Oyunu normal idarə edən baş hakim epizodlara yaxın idi. Vurulan yeganə qolda da mübahisə doğuracaq heç bir məqam yox idi.

Sumqayıt – Kəpəz, KAMAL UMUDLU

Turnir cədvəlinin alt sıralarında qərarlaşan iki komandanın oyununun ilk baxışdan gərgin keçəcəyi gözlənilsə də, Kamal Umudlunun üzərinə o qədər də böyük yük düşmədi. Baş hakim ilk hissənin sonunda “Sumqayıt”ın qapısına penalti təyin etdi ki, onun düzgün qərar verməsi heç kimdə şübhə doğurmadı. Umudlu premyer-liqa hakimləri arasında VAR-a ən çox müraciət edən, qərar vermək üçün çox fikirləşən referi kimi tanınsa da, “Kapital Bank Arena”da bunun heç biri yaşanmadı.

Turan Tovuz – Zirə, RAUF ALLAHVERDİYEV

Oyun qarşılıqlı hücumlar şəraitində keçdi və məhsuldar alındı. Bununla belə, Rauf Allahverdiyev səhv qərarlar vermədi. Üstəlik maksimum sürətli oyuna şərait yaratdı, boş yerə dayanmalar olmadı. 90 dəqiqə ərzində cəmi bir dəfə rəsmi xəbərdarlığa ehtiyac duydu. "Zirə"nin futbolçusu Sərtan Taşkına göstərdiyi sarı vərəqə haqlı idi.

Qarabağ – Neftçi, RƏVAN HƏMZƏZADƏ

Azərbaycan derbisinin maraqlı keçməsi hakimliyinin bir qədər arxa planda qalmasına səbəb oldu. Futbolçular bir-birinə qarşı kobud oynamırdı. Rəvan Həmzəzadə də epizodlara vaxtında müdaxilə edərək hadisələrin böyüməsinə imkan vermirdi. Sadəcə, "Qarabağ"ın 2-ci qolu zamanı Ataa Caberlə Kadi Borgesin yerdə qalması maraqlı məqam idi. Burda "Neftçi"nin legioneri qaydanı pozmuşdu. Həmzəzadə isə “üstünlük” prinsipini işə salıb, görüşü davam etdirdi. Qollar da qaydalar çərçivəsində vuruldu. Ümumiyyətlə, görüşdə idarəçilik baxımından nöqsan olmadı.