“Formula-1” komandalarından “Haas” mövsüm bitəndən sonra Mik Şumaherlə əməkdaşlığı dayandıracağını elan edib.

Komandanın rəsmi saytı texniki direktor Günter Ştaynerin aşağıdakı fikirlərinə yer verib: “Son illərdə komandanın inkişafındakı payına görə Mik Şumaherə təşəkkür etmək istəyirəm. Mil yeniyetmələrin çempionatında uğurlu idi, ardından komandamızda pilot kimi inkişaf etdi. Fərqli yollar seçsək də, bütün komanda Mikə gələcək karyerasında hər şeyin ən yaxşısını arzulayır”.

Medianın yaydığı xəbərə görə, “Alpin” “Haas”dan ayrılan Şumaheri ehtiyat pilot kimi dəvət etməkdə maraqlıdı. Həmçinin onun “Mersedes”in ehtiyat pilotu ola biləcəyi də xəbər verilir.

Şumaher “Haas”ın son qərarına da münasibət bildirib: “Bu, “Haas”ın heyətində son yarışım olacaq. Gizlətmək istəmirəm ki, müqavilə müddətinin uzadılmaması ilə bağlı qərardan çox məyusam. Bununla belə, yaradılan imkana görə həm komandaya, həm də “Ferrari”yə təşəkkür etmək istəyirəm. Birgə keçirdiyimiz bu illər mənə texniki cəhətdən və şəxsiyyət kimi böyüməyə yardım etdi. Zaman-zaman narahatlıq olsa da, inadla mükəmmələşdim. Çox şey öyrəndim və indi “Formula-1”də yeri haqq etdiyimi dəqiq bilirəm. Bu səhifə mənim üçün bağlanmayıb. Uğursuzluqlar məni daha güclü edəcək. Qayıtmaq üçün inadla mübarizə aparacam”.

Yeddiqat dünya çempionu Mikael Şumaherin oğlu 2021-ci ildən “Formula-1” yarışlarında çıxış edir və bu mövsümü 12 xalla 16-cı yerdə bitirdi.
Artıq Şumaheri “Haas”da Niko Hülkenberqin əvəz edəcəyi də məlumdu. 35 yaşlı pilot 2019-dan bəri ilk dəfə “Formula-1”ə daimi əsasda qayıdır. Almaniyalı pilot 2023 mövsümünün sonuna qədər müqavilə bağlayıb. Onun Kevin Maqnussenin komanda yoldaşı olacağını da xatırladaq. “Formula-1” yarışlarında 2010-da “Uilyams”ın heyətində debüt edən Hülkenberq 2017-19 aralığında “Reno” pilotu olub, ardından üç mövsümü “Reysinq Poynt” və “Aston Martin” komandalarının əvəzedici pilotu kimi keçirib və 5 mərhələdə iştirak edib. “Formula1” karyerası boyunca 181 yarışda iştirak edib, bir dəfə də fəxri kürsüyə qalxmayıb.