“Bild”in yaydığı xəbərə görə, “Haas”ın pilotu Mik Şumaher “Formula-1” yarışlarında çıxışını bitirə bilər.

Bu qaynağa inansaq, Amerika komandası ilə müqavilə müddəti 2022 mövsümünün sonunda bitəcək 23 yaşlı pilot artıq danışıqların ilk mərhələsini arxada qoyub. Ancaq tərəflər arasında münasibətlər heç də yaxşı deyil, komandanın bossu Günter Ştayner Şumaheri bir neçə dəfə açıq şəkildə tənqid edib.

O da bildirilir ki, “Ferrari”nin rəhbəri Mattia Binotto pilotun istedadına şübhə etdiyinə görə Şumaherin “Haas”la müqavilə müddətini uzatmasına təsir göstərmək fikrindən uzaqdı.

Mik “Formula-1” üzrə dünya çempionatında ötən ildən çıxış edir. İlk mövsümdə bir xal da toplamadan şəxsi hesabda 19-cu yeri tutub. “Formula-1”in yeddiqat çempionu Mihael Şumaherin oğlu cari mövsümdə 13 yarışdan sonra 12 xalla 15-ci pillədə qərarlaşıb.