“Formula-1” komandalarından “Haas”ın Rusiyanın Ukraynaya hərbi müdaxiləsi üzündən “qapını göstərdiyi” Nikita Mazepin başqa turnirlərə qatılmağı planlaşdırmır:
“Heç bir başqa avtoidman yarışında iştirak etməyəcəm. Bütün diqqətim fondun işinə yönəlib”.
İş ondadı ki, Mazepin çərşənbə günü siyasi hadisələr üzündən əziyyət çəkən idmançılara dəstək vermək üçün fond yaratdığını bildirib. Bu fondun fəaliyyətini Nikitanın atası Dmitri Mazepinin sahibi olduğu “Uralkaliya” şirkəti maliyyələşdirəcək.
Mazepin “Haas”dan ayrılandan sonra ona dəstək verən pilotların da adını çəkib:
“Məni dəstəkləyən bir neçə pilota təşəkkür etmək istəyirəm. Bunlar Valtteri Bottas, Karlos Sayns, Corc Rassell və Serxio Peresdi. Onlar “Formula-1” çempionatında yerimi itirdiyimi biləndən sonra mənə dəstək verdilər. Bir çoxu ilə 15 yaşımdan tanışam. Komanda yoldaşım Mik Şumaherə gəlincə, heç bir dəstək vermədi. Yalnız onu deyə bilərəm ki, hər kəs gerçək sifətini məhz çətin vəziyyətlərdə göstərir”.
Mazepin 2021 mövsümündə şərəfini qoruduğu “Haas”a dönüş variantını da istisna edib:
“Formula-1” təhlükəli idman növüdü, komandana etibar etməlisən. “Haas”ın etdiklərindən sonra bu komandaya necə bel bağlayacağımı bilmirəm. Məni heyətində görmək istəməyən komandaya dönüşüm mümkünsüzdü. Barselonadakı test yürüşlərindən ayrılandan sonra “Haas”ın rəhbəri Günter Ştaynerlə əlaqə saxlamamışam. Bütün bu müddət ərzində o şəxsən mənlə danışmayıb, müqavilənin pozulduğunu press-relizdən öyrənmişəm. Ştayner komandanın rəhbəridi və müqavilənin pozulması ilə bağlı qərara görə tam məsuliyyət daşıyır”.
Xatırladaq ki, Amerika komandası martın 5-də Mazepinlə əməkdaşlığı dayandırdığını elan edib. Artıq 23 yaşlı rusiyalını əvəz edəcək pilot da müəyyənləşib. Bundan sonra “Haas”ın uğurları üçün Mik Şumaherlə yanaşı, danimarkalı Kevin Maqnussen də çalışacaq. 30 yaşlı pilotla uzunmüddətli müqavilə imzalanıb.
“Motorsport” da Rusiya – Ukrayna müharibəsi ilə birbaşa bağlı olan xəbər yayıb. “Ferrari” Rusiuanın dünyaca məşhur antivirus şirkəti olan “Kasperski Laboratoriyası”nın loqotipini bolidlərinin və pilotlarının dəbilqəsinin üzərindən silib. Həmin loqotiplərin yerinə “#essereFerrari” yazısı qoyulub. O da xəbər verilir ki, “Ferrari” Rusiya şirkəti ilə əməkdaşlığı dayandırmayıb, sadəcə, sponsorluq münasibətlərində fasilə yaranıb. Komanda kompüterlərində antivirus proqramlarından yararlanmaqdadı.
“Formula-1” dünyası ilə bağlı daha bir maraqlı xəbər var. “Red Bull”un rəhbəri Kristian Horner “Mersedes”in bolidi dəyişmək qərarına kəskin reaksiya verib.
Xatırladaq ki, Almaniya komandası Bəhreyndə baş tutan mövsümöncəsi testlərdə yan pontonları yetərincə kiçildilən maşın təqdim edib:
“Yeni “Mersedes” qaydaların ruhuna ziddi. Hesab edirik ki, bu maşının bəzi detalları qeyri-qanunidi”.
Bəhreyndəki testlər bu gün bitəcək. Martın 18-20-si aralığında isə elə orda mövsümün ilk yarışı keçiriləcək. Amma belə görünür ki, mövsüm başlamamış “Mersedes” – “Red Bull” didişməsi start götürüb. Allah axırını xeyir etsin!