“Uilyams” Latifini Şumaherlə əvəz edəcək?
“Uilyams”ın rəhbəri Yost Kapitonun dediyinə görə, komanda 2023 mövsümündə “Haas”ın pilotu Mik Şumaherin xidmətindən yararlanmaq variantını nəzərdən keçirir:
“Mik variantlardan biridi. O, “Formula-1” yarışlarında qalmağı haqq edir. Görək nəsə alınacaqmı? Ancaq o bizim üçün variantlardan biridi. Mik ciddi şəkildə irəliləyə və çox yaxşı pilot ola bilər. Corc Rasselin karyerasına baxsaq, o da “Uilyams”da debütant olarkən səhvlərə yol verirdi. “Formula-1” yarışları çox çətindi, “Formula-2” ilə müqayisədə maşınlar texniki cəhətdən daha tələbkardı. Pilota iki il vermək lazımdı ki, üçüncü il nəyə qadir olduğunu göstərə bilsin”.
“Uilyams”ın rəhbəri Nikolya Latifinin yerinə daha hansı pilotun namizədliyini gözdən keçirdiyini də deyib:
“Siyahımızda Loqan Serjant da var. Çox güman, yekun qərar mövsüm bitəndən sonra veriləcək. Düşünürəm ki, Əbu-Dabi mərhələsinin ardından və ya bir-iki həftə sonra”.
“Uilyams” sentyabrın 23-də cari mövsüm bitəndən sonra kanadalı pilot Nikolya Latifi ilə əməkdaşlığı dayandıracağını elan edib. Mik Şumaherin “Haas”la müqaviləsinin müddəti bu ilin dekabrına qədərdi. Almaniyalı pilot 12 xalla şəxsi hesabda 16-cı yeri tutur.
