"Hər iki komanda sürətli oynamaq istəyirdi. İlk hissədə "Qarabağ" fürsətlərdən istifadə edə bilməsə də, oyun üslubunu dəyişmədi. "Neftçi" rəqibin hücumlarını mərkəzdə, özü də komanda şəklində dəf edirdi. Yəni meydanın özünə aid hissəsinə çəkilməmişdi. Bunun məntiqi nəticəsi kimi də hesabı açdılar. Ancaq "ağ-qaralar" anlamalıydı ki, "Qarabağ"a qarşı sona qədər açıq futbol oynamağı və sürətli templə ayaqlaşmağı bacarmayacaq. Çünki Qurban Qurbanovun yetirmələri 60-cı dəqiqədən sonra rəqiblərinə daha çox təzyiq edərək, tədricən onları sıradan çıxarır. Onu görə də "Neftçi" ikinci hissədə mütləq müdafiədən oynamaqla rəqibi əks-hücumlarda yaxalamalıydı. İlk 20 dəqiqəni dözə bilsəydi, "ağ-qaralar" uduzmaya da bilərdi. Gürcüstan millisinin də üzvü olan təcrübəli Kverkveliyanın oyuna ehtiyatda başlaması mənə qaranlıq qaldı. Kadi, Ozobiç, Zubir kimi fərdi keyfiyyətləri ilə müdafiəni yaran futbolçuları zərərsizləşdirmək üçün gürcü müdafiəçi meydanda olmalıydı. Aqil Məmmədov təcrübəli qapıçı olsa da, həyəcanı hiss olunurdu. Buna görə də tələsirdi. Kadinin qolunda onun da mövqe səhvi vardı. Ola bilər, baş məşqçi limitə görə Brkiçi ehtiyatda saxlayıb Aqilə şans verir. Amma legioner daha soyuqqanlı çıxış edir. Qolkiperlərdə soyuqqanlılıq əsasdı. Aqilə həyəcanı üzərindən atmağını tövsiyə edirəm. "Qarabağ"ın bu gün 2 heyətlə oynayır. Komandanın iştirak ərizəsində yer alan bütün futbolçular peşəkar döyüşçü kimidi. Yəni hər an meydana çıxaraq oyunu dəyişə bilirlər. Hər mövqedə ən azı 2 futbolçu arasında sağlam rəqabət var. "Neftçi"nin futbolçuları həm 90 dəqiqə eyni tempdə oynaya bilmir, həm də ehtiyatdan meydana çıxaraq dəyişiklik etməli olanlar "Qarabağ"ın futbolçularının səviyyəsində deyil. Məsələn, "köhlən atlar"a qarşı ən yaxşı oyun keçirən və qol vuran Eddi İsrafilovun 65-70-ci dəqiqədən sonra gücü tükənir. "Qarabağ" - "Neftçi" matçını derbi adlandırmazdım. Çünki meydan sahibləri fasilədən sonra aşkar üstünlüklə matçın taleyini həll etdi. "Qarabağ" - "Sabah" oyunu daha çox derbiyə yaxındı. Çünki Murad Musayevin komandası sona qədər döyüşdü, hətta uzatma dəqiqələrində belə intriqa davam edirdi. Düşünürəm ki, mövsümün çempionu bəllidi. "Neftçi" ən yaxşı halda 2-4-cü yerlər uğrunda mübarizə aparacaq".

"Oyunu derbi adlandırmazdım. Amma adına görə xüsusi matç idi. "Qarabağ" 1-ci hissədə dominant, yaradıcı oyunu ilə "Neftçi"ni üstələdi. Sadəcə, əlverişli fürsətləri dəyərləndirə bilmədi. Bir qədər bəxtsizlik də vardı. Fasilədən sonra isə "Qarabağ"ın coşduğunu gördük. 18 dəqiqəyə 3 qol vurmaqla matçın taleyini həll etdilər. Əslində daha çox qol vura bilərdilər. Sadəcə, şanssızlıq oldu. İstənilən halda "Qarabağ" çətinlik çəkmədən növbəti qələbəsini qazandı”.