Misli premyer-liqasında 13-cü turun oyunları keçirilir.

"Sabah" səfərdə "Səbail"dən güclü olub - 2:0. Matçdan sonra meydan sahiblərinin çalışdırıcısı Mahmud Qurbanovun mətbuat konfransı keçirilib. Sizi mütəxəssisin fikirləri ilə tanış edirik:

- Səfərdə “Sabah”dan xal ala bilmişdiz. Bu gün nə çatmadı?
- Bu dəfə ustalıq çatmadı. Son oyunlarda fərdi səhvlərdən qollar buraxırıq. Qalib gəlmək istəyirdik. Bu gün fərdi səhvlər və rəqib oyunçuların ustalığı rol oynadı.

- 13 tura 10 xal toplamısız və son “4-lük”dəsiz. Bura gələndə belə gedişatı gözləyirdiz?
- İstəməzdim ki, bu situasiyua ilə üzləşək. Üst sıralarda olmaq üçün çalışacağımızı düşünürdük. Reallıq budu ki, aşağılardayıq. Sona kimi mübarizə aparacağıq.

- Çox yorğun və küskün görünürsüz...
- Əhval-ruhiyyə nəticədən asılıdı. Əlimizdə olan futbolçulara şans verməyə çalışırıq. Ən çox narahat edən odu ki, onlar bunu başa düşmürlər. Uduzmuşuqsa, belə əhval normaldı.

- Qışda heyəti gücləndirmək üçün hansı addımları atacaqsız?
- Hələ ona çox var. Qarşıda ağır matçlarımız olacaq. İki cəzalı, iki zədəli əsas heyət oyunçumuz var idi. Müdafiə olunmaq asandı. Amma gərək hücum edə biləsən ki, müdafiəyə də çox güc düşməsin. Sağ cinahdan hücumlar edirdik, amma sol tərəf axsayırdı. Qarşıda çempionat matçları var. İndi oturub qışı gözləyə bilmərik. Amma bəzi mövqeləri gücləndirməliyik.

- Hüseynəli Quliyevi səhvinə, yoxsa zədəsinə görə əvəzlədiz?
- Həm zədəsi var idi, həm də əvəzlənməyə ehtiyac hiss etdim. Bacardığımız şeyləri etməliyik. Bacarmadıqlarımızı etməyə çalışanda belə səhvlər olur.

- Yayda komanda quruculuğunda sanki tələskənlik oldu. Qış üçün indidən izlədiyiniz oyunçular var?
- Qışa kimi 5-6 matçımız var. İstəyirik ki, tələskənlik olmasın. İzlədiyimiz futbolçular var. Yerli oyunçular transfer etmək istəyirik. Bəzi futbolçularla maraqlanırıq. Hazırda əlimizdə olanlardan istifadə etməliyik.

- Mahmud Qurbanov kimi futbolçunun komandasının belə oynaması necə təsir edir?
- Tək mənə yox, azarkeşlərə də, futbolçulara da, rəhbərliyə də pis təsir edir. Oynayan dövrdə necə idimsə, həmin iddialar qalır. Görünür, vaxt lazımdı. Nəsə düzəltmək istəyirik. Bunun üçün çalışacağıq. Belə asan başa gəlmir. Bəhanə gətirmək istəmirəm. Amma vaxt və bəzi mövqelərə oyunçular lazımdı.

- Yay transferlərində tələskənlik olub. Qış üçün bir skaut heyəti formalaşdırmaq olmazmı ki, belə səhvlər təkrarlanmasın?
- Bəzi futbolçuların transferində tələskənlik olub. Bu gün yuxarı yerlər uğrunda mübarizə aparmaq istəyiriksə, keyfiyyət önəmlidi. 90 dəqiqə qaçmaq yox, futbol oynamaq, ustalıq göstərmək lazımdı. Gələcəkdə ola bilər belə şey olsun və normal futbolçular tapaq.