"Ustalıq öz sözünü dedi" - Ayxan Abbasov
Misli premyer-liqasında 7-ci tura start verilib.
İlk oyunda "Sabah" "Turan Tovuz"u qəbul edib. Meydan sahiblərinin qələbə qazandığı görüşdən (3:1) sonra qonaqların çalışdırıcısı Ayxan Abbasovun mətbuat konfransı keçirilib. Sizi mütəxəssisin fikirləri ilə tanış edirik:
"Allah şəhidlərlərimizə rəhmət eləsin, ailələrinə səbr versin. Oyuna gəldikdə isə, "Sabah"ın gücü bəlli idi, iddialı komandalarımızdandı. Təəssüf ki, oyuna yaxşı başlaya bilmədik. Qırmızı vərəqədən sonra oyun planımız pozuldu və rəqib bundan istifadə etdi. İkinci hissədə futbolçularım həqiqətən yaxşı mübarizə apardılar, qol da vurduq. Bəlkə də gücümüz qalsaydı, sonda ikinci qolu da vura bilərdik. Belə oyunlar bizim üçün yaxşıdı. Gənc futbolçular var, belə matçlarda inkişaf edəcəklər. Çempionatda fasilə yaranacaq. Gələn ay sıx qrafikdi. Səhv etmirəmsə, beş oyun olacaq. Bu fasilədən səmərəli istifadə edib hazırlaşacağıq".
- Demək olar ki, gözlədiyiniz "Sabah"ı görmədiz?
- Bu gün "Sabah"ın ciddi itkiləri var idi. Rəqib haqda çox danışmayım. Gerçəkçi olmaq lazımdı, futbolçularımız hücumların qarşısını ala bilirdilər. Kaşuk və Letiç cinahlarda yaxşıdılar. Orada da yaxşı ola bilsəydik, demək olar ki, təhlükə yox idi. Amma yenə də ustalıq öz sözünü dedi. Mövsüm uzundu. Onların da bizim də düşüşü, yaxşı oyunları olacaq. Gələn oyunlarda xal qazanmağa çalışacağıq.
- İkinci məğlubiyyətinizdi. İkisində də oyunçunuz qırmızı vərəqə almışdı. Bu haqda nə deyə bilərsiz?
- İkisi də oyun epizodu idi, bir az sərtlik var. Nizam-intizamla bağlı bir şey olsaydı, bizi narahat edərdi. VAR sisteminin gəlişi ilə çempionatlarda qırmızı vərəqələrin, penaltilərin sayı çoxalıb. Normaldı. Amma "Qəbələ" ilə oyunda sərtliyin şiddəti o qədər də deyildi. Bu gün isə şiddət var idi. Bir az ehtiyatlı olmalıyıq. Çünki, "Sabah"a qarşı 10 nəfərlə oynamaq çox çətindi.
- Turan Vəlizadənin oynamamağının səbəbi nədi?
- Rotasiyalar olur. Zədəsi yoxdu. Gənc futbolçularımız çoxdu. İstəyirik ki, onlara da şans verək. Növbəti oyunlarda da rotasiyalar edəcəyik.
- Ardıcıl qələbələr qazandız. Bu, futbolçularda arxayınlıq yaratmışdı?
- Xeyr, deməzdim. Futbolcuların məşqdə, bu gün oyunda istəkləri göstərir ki, elə deyil. Onlara bildirmişəm ki, biz hələ heç nə etməmişik. Öz gücünüzə yaxın komandalara qalib gəlmək yaxşıdı. Bu matçlarda xal ehtiyatımızı artırdıq. Bu, futbolçuların inkişafı üçün vacibdi. Çünki, məğlub olanda psixoloji durum yaxşı olmur.
- Hakimə kəskin etiraz edirdiz. Bunun səbəbi nə idi?
- Böyük etirazım ona idi ki, sanki, qərar verə bilmirlər. Görürük ki, Avropada daha tez qərar verirlər. Yəqin ki, yenidi, ona görə belə olur. İlk hissədə 10 dəqiqə oyun dayandı. İkinci hissədə epizodlar oldu ki, sarı vərəqə vermədi.
- Mövsüm başlayandan qapıda Tərlan Əhmədliye şans verirsiz. Daha təcrübəli Kamal Bayramovun oynamaq ehtimalı var?
- Kamala böyük güvənimiz var. O, bizim kapitanlarımızdandı. Mövsüm ərzində ona da şans verəcəyik. Tərlan və Kamalın bizim komandada olması böyük üstünlükdü. Çünki, qapı xəttində rahatıq.
Digər xəbərlər
